OSHAKATI - Engathithi lyAanamibia olya li lya teka omukumo mOshakati shoNamibia a dhengwa koshishiindalongo Angola ookoola 3-0, sho ya li ya kutha ombinga muudhano wu li pokati kiilongo yaAfrica.
Elelo lyondoolopa lyOshakati okwa li lya etele aakalimo yawo oradio yomuzizimbeyuunene kaaku na we opo ya tale etanga kEkuku mOshakati.
Nonando kwa kundanwa kutya Namibia okwa pondola okuza ko noshimaliwa shoomilliona, Aanamibia okwa li ya hala okusindana epapa.
Gumwe gwomaayambdidhidhi, Jackson Shitaatala okwa ti okwa kala nokulandula etenga okuza sho omushona, ta popi kutya Namibia okwa li ta dhana nawa, okwa li a kutha aadhanitanga dhingi, ashike okwa li a adhika kaadhanitanga aakwawo.
“Uupyakadhi owuli kepangelo lyetu, itandi wu pe nando aadhani, katu na uupale moshilongo shetu, aadhani yetu ohaya ka dhanena kondje yoshilongo,” ta nyenyeta ngaaka. Ta ti, etanga oshinima hashi etitha enyanyu moshilongo oshowo oshimaliwa moondoolopa dha yooloka, ihe moNamibia etanga itali simanekwa nando ngaashi lyi na okusimanekwa.
Ta ti epangelo nali shule ko oongaku ee tali tungu uupale wu li pamuthika gokudhanenwa omaudhano omanene.
Simon Simeon ngoka naye a li a teka omukumo shoNamibia a dhengwa okwa ti aadhani okwa li ya dhana nawa, nonando pe na ngaa uupuko uushona wa pumbwa okupukululwa.
“Otatu pandula aadhani yetu ya li ya kondjo sigo ya thiki ponkatu mpoka ya thiki, inaya thikila ashike taya pakele, uudhano aluhe owu na esindano nekano,” ta popi ngaaka.
Ta ti, okwa ndhindhilike kutya epangelo lyaNamibia ohali yambidhidhidha unene uudhano wokutondoka, ihe okutondoka itaku elekwa nuudhano wetanga.
“Etanga ohali gongaleke nohali nyanyudha aantu onkene olya pumbwa wo okuyambulwa po,” ta popi ngaaka.
Maria Johannes okwa ti, Angola okwa li a tokola Namibia, uudhano owa li wa kwata miiti.
“Otandi gandja omake kaadhani sho ya li ya dhana nawa lela,” ta pandula ngaaka.
Katarina Kamari, omupopiliko gwelelo lyondoolopa lyOshakati okwa ti oya li ya etele aakalimo yawo oradio yomuzizizmbe onene opo ya landulile etanga pamwe.
“Otwa li twa ndhindhilike okuza komaudhano ga holoka mondoolopa yetu nkene oshigwana hashi yamukula nohole ye na nomaudhano getanga,” ta popi ngaaka.
– vkaapanda@nepc.com.na