ONGWEDIVA- Omukulunhuwiliki wehongo moshitukulwa shaShikoto Aletta Eises okwa ti omukundu wovahongifikola veendodo dopetameko osho wa kandulwa po shaashi ounona ova tameka ofikola paife.
Okwa ti ounona 57 vondodo yotete moshitukulwa shaShikoto osho va tameke ofikola konima eshi kwa li ve li komaumbo shaashi pehe na ovahongifikola.
Eises okwa koleka ta ti ounona ova tameka ofikola konima yoivike itatu.
Okwa ti ombelewa yaye oya kuta ovahongifikola vavali nelalakano lokukandula po omukundu wounona ovo kwa li ve li komaumbo.
“Osha fimana ngeenge okaana ta ka pewa ehongo lopetamako unene tuu okulesha, okushanga nokuvalula,” ta ti.
Eises okwa ti ombelewa yaye otai ka kuta ovahongifikola 43 tava ka longa eendodo ngaashi ondodo yotete noshoyo ondodo onhi-8 molwashi odi hadi ovanafikola va finanamo meengulu.
“Otuna oupyakadi weendodo dimwe diha di ovanafikola. Omukundu ou otau ka ndulwa po neudo,” ta ti.
Eises okwa popya yoo vali kombinga yomashongo ngaashi omhumbwe yomeva keefikola noshoyo eepate dii da uka keefikola.
Omukulunhuwiliki wehongo koshitukulwa shaHangwena Isak Hamatwi okwa weda po ta ti omukundu wounona veendodo dopetameka ovo kwa li ve li komaumbo owa kandulwa po nomoshitukulwa shaye.
“Moshitukulwa shetu ka muna vali okaana ke li keumbo konima eshi twa kuta ovahongifikola,” Hamatwi ta ti.
Neudo, omukulunhuwiliki mounimisteli wehongo Sanet Steenkamp okwa ti ovahongifikola ve dulife 200 otava ka kutwa okulonga eendodo dopetameko.
Okwa ti elalakano okukandula po omukundu wovahongifikola veendodo dopatameko ina va wana noshoyo okukwashipaleka kutya ounona ova mona omhito yokuya kofikola.
“Osha fimana ngeenge okaana ta ka mono ehongo lopetameko molwashi otashi kwafele okupendula ouluvi wokaana,” ta ti.