Omukulunhu koshikondo shokukonakona oimbuluma mOhangwena, omupedu Commissioner Zachariah Amakali okwa ti opolifi oya pewa ouyelele okudilila moshiwana medipawo lomuhongifikola Natanael Nghihalwa.

“Ohatu ka ninga omakonakono omoule twe likwatelela kombinga youlele ou twa mona po okudilila moshiwana,” Amakali ta ti.    

Amakali okwa pandula oshiwana eshi ha shi longele kumwe nopolifi mokuyandja ouyelele shaashi otashi kwafele opolifi i ninge omakonakono noupu.

 Nghihalwa weedula 39 okwa xulifa oshivike sha djako efimbo loufiku konima eshi vati a yashwa nondjebo kovalumenhu vavali ndele tava faduka po.

Oshiningwanima osha ningwa meumbo lavo momukunda Oshikwiyu moshitukulwa shaHangwena.

Ota ku hokololwa kutya Nghihalwa efiku olo okwa dja pendingosho yaye i li mOmungwelume omo kwa li e kelikosha.

Okudja opo manga kwa li tadi kokalikoshelo okwa ponokelwa kovalumenhu vavali noku ya shwa lwoikando ya yooloka.

Ovafekelwa ova teta yoo vali otuwa yaNghihalwa nomakatana komalola.

Omuhongifikola ou meumbo okwa li elimo namumwainamati pefimbo loshiningwanima.

Lwopokati opo, Amakali hokolola ta ti olutu laNghihalwa ola pwa okuningilwa omakonakono etando onghee ola yandjwa kofamili yaye opo li dule okukala ya ninga omalongekido epako.

Okwa ti nonande ope na ouyelele wa yandjwa, opolifi onghee nga tai indile moshiwana opo shi twikile nokuyandje ouyelele kopolifi kombinga yedipawo laNghihalwa.

“Otwa pumbwa ouyelele wa wana. Omunhu keshe ta ka yandja ouyelele okwa a menwa kopolifi onghee oshiwana na shi manguluke okuyandja ouyelele,” ta ti.

Nghihalwa ota fudikwa mOlomakaya komukunda wavo. fhamalwa@nepc.com.na