Elelo lyondoolopa lyOshakati ota li hiya oosipana dhaadhanitanga lokoompadhi netanga lyomokambamba, dhiinyolithe opo dhi kuthe ombinga momaudhano gEkopi lyaMayola ngoka taga ka kala ko okuga momasiku 09 sigo 12 gaMei nuumvo.
Mayola gwondoolopa yaShakati Leonald Hango okwa popi kutya omaudhano ngoka otaga ka ningwa oshikando oshitine.
“Omumvo nguka omaundhano ngaka otaga ka kala ga yooloka komakwawo agehe ga ningwa omimvo dhapiti oshoka nuumvo otwa tula po oshimaliwa shakola,” ta popi ngaaka.
Hango okwa ti, oya topola omaundhano gokoompadhi moongundu ndatu, omanga etanga lyomokambamba lyili mongundu yimwe.
Ta ti, ongundu yotango oyaamati yaanyasha, mboka taya ka topola oshimaliwa shoN$51 000 sha kwatela mo oombadhi. Kehe ongundu otayi kiinyolitha koshimaliwa N$1 100.
“Osipana tayi ka sindana otayi ka mona oshimaliwa N$22 000, ekopi oshowo oombandi dhoshingoli dhili 18. Osipana tayi keya puutiyali, otayi ka sindana oshimaliwa shoN$14 000 noombandi dho siliveli dhili 18. Osipana ya landula ko otayi ka mona oN$5 500 nosipana ya huginina otayi oN$1000,” ta fatulula ngaaka.
Okwiinyolitha kwongundu ontiyali okuna N$850 kehe mosipana kehe. Oshimaliwa tashi ka topolwa mongundu moka oN$21 000 ndjika ya kwatela mo oombadhi.
Osipana yotango tayi ka sindana oshimaliwa shoN$9 000 noombandi dhoshingoli dhili 18, ontiyali otayi ka mona oN$6 000 noombandi dhosiliveli 18 omanga ya hugunina tayi ka mona oN$3000.
Hango okwa ti, ongundu ontintatu, oye tanga lyokoompandhi lyaakandhona, tayi ka topola oshimaliwa N$10 000 ndjoka naya kwatela mooombadhi. Okwiinyolitha oN$600.
“Osipana yotango otayi ka sindana oshimaliwa N$4000 noombandi dhoshingoli 18, ontiyali otayi ka mona N$3000 noombandi dho siliveli dhili 18,’’ ta ti ngaaka.
Ongundu ya hugunina, yo otayi ka topola oN$10 000, ndjoka nayo ya kwatela mo oomdadhi, nokwiinyolitha okuna N$600.
Ta ti, osipana yotango otayi ka sindana N$4000 noombandi dhoshingoli 12, ontiyali N$3000 noombandi dho siliveli dhili 12 omanga ya hugunina tayi ka mona oshimaliwa N$1 500.
Mayola gwondoolopa yOshakati okwa kumagidha oosipana ndhoka ndhi na ehalo oku kutha ombinga momaudhano moka, ya tameke okwiinyolitha nena.
-vkaapanda@nepc.com.na