OSHAKATI - Ethimbo ndika lyomatango manene ondoolopa yaShakati ohayi kala yuudha aatalelipo, niinyangandhalwa oyindji otayi ka holoka, onkene elelo lyondoolopa yaShakati olya indile oshigwana shi kale ke ondoolopa ya yela.
Elelelo lyondoolopa lyaShakati mEtitano olya li lya kutha onkatu opo li opaleke ondoolopa ayihe koonono.
Pethimbo lyoshiindingili shika Mayola gwondoolopa yaShakati Leonard Hango, okwa li a kunkilile nomuthindo kutya uuyogoki owo nawu kale tango.
“Natu kalekeni ondoolopa yetu ya yela, naatalelipo nayo otaya kumagindhwa ya kale ke ehala ngaashi lye li adha,” ta kumagidha ngaaka. Mayola ta ti, uuyogoki ohau tamekele momagumbo. Ta gwedha po ta ti, ehalo ndyoka lya yela ohali hili wo aantu oyendji. “Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka.
Ta kumagidha oshigwana shaShakati kutya, nashi kale sha tula uuyogoki komeho.
“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka.
Hango okwa ti, esiku ndyoka inali kala olyo ta li opalekitha aakwashigwana, ihe nashi kale onkalondjigilile noshi holelwa sho ku opaleka. Omugandji gwomauyelele melelo lyondoolopa lyaShakati Katarina Kamari okwa ti, okwa nyanyukilwa aakalimo yomOshakati sho ya kutha ombinga oku opaleka ondoolopa yawo.
“Ngaashi naana, sha kala noku tumbulwa kutya, ondoolopa yaShakati nayi zi ze, otandi kumagidha aakwashigwana ya itule mo moku tsika omiti,” ta kumagidha ngaaka. Ta ti, omiti ohadhi dhana onkandangala mo mikalo ndha yooloka, nodha simana wo monkalamwenyo yomuntu kehe.
“Omiti ohadhi opalekitha oondoolopa, ohandhi gandja ombepo nohadhi koleke uundjolowele womuntu,” ta ti ngaaka.
Ta kumagidha oshigwana ta ti, nashi kale oshinakugwanithwa sha kehe gumwe okutsika omiti.
Kamari ta ti, uuyogoki otawu kala po ashike uuna, kehe gumwe tewu simaneke noku wu tula miilonga.
“Ondoolopa otayi kala ombwaanawa uuna ya yela,onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka.
Ta ti, kehe gumwe na kaleke ehala lye lya yela, opo shi kale oshi holelwa sha kehe gumwe. Ehumo komeho lyondoolopa oha li holoka una pe na uuyogoki.
vkaapanda@nepc.com.na