OSHAKATI -Aanyasha yaamati mOshakati mboka ya kutha oshilonga shoka hashi longwa unene kaakiintu, okuninga iipanyala oshowo oombafu, oya ti inaya hala okuninga aafuthi.
Otaya nyenyeta kutya otaya ningilwa omatilitho kugumwe gomaaleli aakuluntu momatala kutya, otaya tidhilwa momapandaanda.
Aamati mboka ohaya longo iilonga ayihe mbyoka kondando yi li pevi, notaya longo neitulemo.
Taya popi taya ti, ohaya longo nawa ethimbo lyaDesemba, oshoka onooli ohayi kala yu udha nawa, ihe nena otaya tidhilwa momapandaanda.
Fillipus Elunde ngoka ha tula aantu iipanyala noombafu komeho gomatala okwa ti oha longo aantu ya thika puyaheyali mesiku lyowala, omanga momasiku gomakwato aantu 20 oha vulu oku ya longa.
“Ohandi pula ashike N$100 koonyala nokoompadhi oshowo N$100 okutula oombafu ndhoka han
dhi kala ko omwedhi aguhe. Ihandi longo omuntu ta kala inaa galukila ndje,” ta popi ye ta imemeha.
Elunde okwa hokolola kutya omukuluntu gomatala okwa kala noku ya hepeka, te ya tidhagula nokutatula po iilongithomwa yawo.
Ta ti, pehala mpoka haya longele kondje yomatala ohaya ningilwa omatilitho kutya oye na okuza po ya ka longele momapandaanda. Johny Matias ngoka a li ta ningi iipanyala esiku ndyoka okwa ti, pehala mpoka taya longele komeho gomatala oya pewa po komusamane gumwe, ngoka e ya kwathele ashike konima ya li ya tindilwa ehala meni lyomatala.
“Otwa li hatu longele pokatala kamwe ke li meni, ihe otwa tidhwa po komukuluntu gomatala, anuwa tse Aaangola, otatu kutha po ookasitoma dhAanamibia mboka taya longo iiloga ya fa yetu ye li momatala,’’ ta popi ngaaka. Ta gwedha po ta ti, okwa kala nokufatulula kutya oya valelwa moNamibia, nonando omagumbo gawo oge li koAngola.
Matias ta ti, yo kaye na nando uupyakadhi wokufutila omahala, shoka ya hala okulonga ashike opo ya vule okwiihupitha.
Gumwe ngoka inaa popya edhina lye okwa ti otaya longo nuudhigu na inaya hala okuguma iinima yaantu.
“Tse otu na uuthemba wetu waNamibia, oshike tu na okutidhwa? Ta pula ngaaka.
Mayola gwondoolopa yaShakati Leonard Hango sho kwa li a pulwa a tye ko sha kombinga yaanona yaamati mboka ya taalela omashongo ga yooloka omanga taya nyangadhala okwa ti aantu ayehe naya pewe omayakulo ga faathana sha ikwatelela komilandu dhoka dhi li po.
“Shama ashike omilandu ndhoka dha tulwa po kelelo lyondoolopa dha gwanithwa po, nena aantu naya pewe omahala gokulonga opo ya mone iiyemo yawo, yo ya iihupithe,” ta popi ngaaka.
Omukwatakanithi gwomatala gaShakati Thomas Salomon okwa ti, sha ikwatelela komilandu dhelelo lyondoolopa yaShakati, omahala gokulandithilwa ohaga gandjwa ashike kAanamibia ihe kaku shi kaAangola.
“Ngoka e na uuthemba waNamibia okwa manguluka okuninga omayindilo opo tu mu pe ehala mpoka ta vulu okulongela. Onda ndhindhilike kutya paamati mboka taya longo iipanyala, ope na ashike gumwe oye e na uuthemba waNamibia,’’ ta popi ngaaka.
Ta gwedha po ta ti, yo kaye na nando uupyakadhi waantu taya shingitha, oshoka omatala osho ge lile po, okugandja omahala kaantu ya nyangadhale.
vkaapanda@nepc.com.na