Ovanailonga vouhaku koshipangelo shaMuthiya otava nyenyeta kombinga yonghalo yoshipangelo shavo osho vati sha ninga oule woivike ivali shihe na omeva.
Ova hokolola tava ti ohava twala omalapi okeembete oshipangelo a ka koshwe koshipangelo shaNandjokwe noshoyo oku ka tala omeva okuwapalekifa moshipangelo.
Ovapangi ova ti unene tuu kokanyofi kokupulumunina ohaku kala ku na eshongo linene la taalelwa koomeme ve liumbata molwaashi ohava kala va pumbwa omeva okulikwafela konima ngeenge va pulumuna.
Ova yelifa tava ti paife omeva okwa aluka konima eshi ninga oivike ivali a pata ashike natango ova limbililwa kutya omeva otaa ka pata.
Umwe womupangi koshipangelo oko okwa hokolola ta ti ohava longo noudjuu ngeenge moshipangelo muhe na omeva molwaashi ihava dulu vali okuyandja omayakulo ouhaku e lixwa po kovanaudu.
“Moshipangelo ohamu kala ashike mwa kaka tamu nyika edimba tali di moundjuo. Ovanaudu noshoyo ovanailonga ihatu longifa vali oundjuo molwaashi kape na omeva,” ta ti.
Okwa weda po ta ti ova ninga eenghendabala dokutwalela omeva koshipangelo opo va dule okuyandja kovanaundu vamwe omiti davo.
Omuwapaleki moshipangelo shaMuthiya okwa weda po ta ti onghalo yokuhe na omeva koshipangelo oya eta oshipangelo shi kale sha kaka molwaashi pa kala pehe na omeva okuwapalekifa.
“Ohatu longo noudjuu ngeenge hatu wapaleke oshipangelo. Ka shipu okulongela monhele ya kaka tai di edimba molwaashi otashi dulu okueta omikifi odo hadi dulu okuetwa kekako,” ta hokolola.
Eshi a kwatafana naKundana omukulunhuwiliki wouhaku moshitukulwa shaShikoto Joshua Nghipangelwa okwa ti ombelewa yaye oya didilika omashongo a taalelwa koshipangelo shaMuthiya unene tuu eshongo lomeva haa pate oule wefimbo lile.
Okwa ti omeva koshipangelo ohaa kala a pata molwaashi omunino womeva wa dja kOndangwa ohau kala tau ende nakashona.
Onghee okwa ti oupyakadi womeva haa pate owa kuma odoolopa aishe yaMuthiya.
“Otwa tameka nale okutunga otenga yomeva tai kala moshipangelo opo i kale tai longifwa ngeenge omeva a pata,” Nghipangelwa ta ti.
Okwa weda po ta ti ovakulunhu voipangelo nava kale alushe tava lopotele ombelewa yaye pefimbo ngeenge koipangelo ku na omaupyakadi.