Hilma Nakanduungile

ENDOLA - Ominista yiikwameni, omataaguluko gokoongamba negameno lyoshilongo, omundohotola Albert Kawana, okwa patula pambelewa oshitaasi shopolisi moshitopolwahogololo shaNdola, mOhangwena, Etitano lya zi ko.

Oshitaasi sha tulwa miilonga osha kwatela mo oombelewa dhokuyakulila oshigwana, omalukalwa gaaniilonga, ondunda yandohotola, omboola yomeya, oohauto mbali oompe ndhoka tadhi ka longithwa mokugandja omayakulo koshigwana, nayilwe, kongushu yo-N$ 42, 582,108.60.

Pethimbo a popitha engathithi lya li lya gongala pepatululo lyoshitaasi, Kawana okwa ti, oku na einekelo kutya aaniilonga moshitaasi otaya ka longa nuudhiginini okuyakula oshigwana, mwa kwatelwa, okukaleka po egameno, oveta nelandulathano, nosho wo okugamena oomwenyo nomaliko goshigwana.

Kawana ta gwedha ko ta ti, oshikondo shopolisi otashi kwashilipaleke kutya osha andjaganeka omayakulo  gopolisi mpoka taga pumbiwa.  “Opo tu kwashilipaleke kutya ombili nelandulathano oya kwatelwa po mOshilongo shetu, Epangelo olya sila notali tsikile nokusila oompumbwe dhetanga lyopolisi oshimpwiyu,” Kawana ta ti ngaaka.

Okwa takele wo aalongi yiimbuluma mboka haya umbu aanambelewa yopolisi omunwe, noku ya kunkilila ye shi hulithe po mbala. Ina thiga wo emanya lya londa kekwawo, ngele tashi ya kiilyo yomen and women network mbyoka hayi holoka moshigwana ye ga fila.

“Opwa ningwa etokolo opo uuna taku ningwa omadheulo gopolisi, mu kwatelwe wo iilyo yomen and women network miitoplwa 14 moshilongo, mbyoka ya gwanitha po iipumbiwa noyi na omayihumbato taga opalele moshigwana. Ngele otamu kolwa sho mu li iilyo yomen and women network, nongele mwa ka ninga aanambelewa yopolisi osho owala tamu ka kala tamu kolwa ngaaka, onkene hulithii po oshinima shika. Ngele hasho, otatu ke mu kutha omizalo dhiilonga,” Kawana ta ti ngaaka.

Sho a popitha oshigwana pepatululo lyositaasi shopolisi pEndola, Kakukutu komatanga gopolisi, Inspekta General Josef Shikongo, okwi indile opo etanga lyopolisi lyi lwithe iimbuluma muukumwe, nokuyakula oshigwana kehe mpoka tashi iyadha. 

“Inapu kala oongamba mpaka. Oshigwana nashi yakulwe ethimbo kehe. Omukwashigwana e na oshipotha, ne shi lopote mpoka pu na oshitaasi shopolisi. Ngele owa za kUutapi e to iyadha mEndola wu na shoka wa ningwa, patulula oshipotha shoye epeko tali tumwa yi ka konakonwe,” Shikongo ta ti ngaaka.

Ta indile wo oshigwana opo shi simaneke aanambelewa yopolisi, nokukunkilila aalongi yiimbuluma ya hulithe po okukuthila aanambelewa yopolisi oondjembo, uuna taya longo iilonga yawo.

Aanambelewa yopolisi ye li 18 otaya ka yakula oshigwana poshitaasi pEndola.