Aluhe ngele taku ningwa iituthi yontumba yenyanyu, ngaashi oohango, omavalo, omashasho nosho tuu, Aawambo ohaya imwenyeke nomaudhauno gOshiwambo.
Ngele taku dhanwa iidhano yOshiwambo, mboka ye ya poshituthi ohaya mono esimano lyoshituthi shoka.
Ongundu Shakalyenge yokoshikandjohogololo Etayi oya li ya ulike uunkulungu wayo esiku ya li taya dhimbulukwa nokutyapulwa esiku lyemanguluko lya piti.
Oyendji ya li ya gongala oyali ya thigwa niipala ya nyanyakwa sho ongundu ndyoka yali ya zi mondambo. Omaluvu giilya omulilo goshilongo
Piituthi natango ohapu hangwa omalovu giilya, ongomuthigululwakalo.
Silka Nathanael gwomimvo 53 momukunda Etayi okwa fatulula nkene omalovu giilya haga hangwa oshowo esimano galyo. “MOshiwambo omalovu giilya ihashi shiwa ga kale kaage mo moshituthi shontumba. Omanga iikunwa yopailumbu inaayi dhungwa, otwa kala hatu kutha po enota niikunwa yetu yOshiwambo,” ta fatulula ngaaka.
Ta ti, oye na iikunwa ya yooloka ngaashi oontaku, omalunga, omagongo, oshinwa niikwawo oyindji haye yi eta po yoyene.
“Omalavu giilya oge na omulandu nkene haga dhungwa, nongele owu na omutse omukukutu, ito ga dhungu,” ta popi ye ta imemeha.
Ta popi ta ti, osha simana ngele oshigwana tashi tsikile okugwanitha po nokusimaneka omuthigululwakalo, oshoka ogo omulilo goshilongo. Okwa hokolola nkene aantu taya kanitha eyitaalo lyomuthigululwakalo omolwontseyo ya pumba.
“Inamu dhina shoka mwa adha ko nale, ngele taku popiwa kutya ‘pamuthigululwakalo’ simaneka shoka tashi popiwa,” ta popi ngaaka.
Ta popi ta ti, muuyuni wo nena, kamu na nando ogumwe e na uuthemba okudhina nokuteya gula po omuthigulwakalo.
Aantu oye na omithigululwakalo dha yooloka nonando yimwe yomuyo ya faathana.
Nathanael okwa kumagitha aanyasha ya tameke okwiilonga shoka yaa shi kombinga yomuthigululwakalo, opo ya vule oku ka longa aanona yawo monakuyiwa, go gwaase po. “Oshinakugwanithwa shetu mbaka tu li ko sigo opaife, tu longe aanona yetu, oshoka ngele otwa mwena, omuthigululwakalo otagu hulile mutse, nongele otwa ka kana ko
atuhe, nago otagu hulu ko,” ta fatulula
ngaaka.
Ta gwedha po ta ti, oyendji otaya ipula kutya oshike iiningwanima yi nyanyaleka tayi holoka, ihe muuyuni wonale ka yali hayi ningwa, shi shiweni kutya, ayihe otayi ningwa omolwomulilo goshilongo ngoka itaagu simanekwa we.
– vkaapanda@nepc.com.na