Ovakainhu kewalanda koshipangelo shaNandjokwe itava ka telekela vali momutenya ile modula molwashi paife ova tungilwa etala lomudile nokukala ngeenge tava teleke.

Edi oda popiwa komukulunhuwiliki wouhaku moshitukulwa shaShikoto Joshua Nghipangelwa a hokolola ta ti etala ola fimana kovakainhu ve li mateelelo.

Okwa ti etala ola tungwa pongushu yoshimaliwa shidulife eeN$250 000.

Okwa didilikwa ovakainhu kewalanda hava mono oixuna kwa li ngeenge tava teleke oikulya yavo shaashi ohava kala ashike ve li momutenya omanga pefimbo lodula iha va dulu okuleka molwashi ponhele opo oha patalama omeva.

Ewalanda onhele oyo hai kala ovakainhu ve li momateelelo hava ka teelela ngeenge ve li popepi nokupulumuna.

Ewalanda oha li kwafele unene ovakainhu hava di komikunda dokokule shaashi ngeenge tava fetwa iha va ende vali oshinano shile molwashi ola tungwa li li popepi noshipangelo.

Neudo ewalanda ola longululwa noundjuwo noulikoshelo navo ova longululwa konima eshi ovakainhu kwa li ha lyata omeva onyata takunguluka okudja moundjuwo.

Ewalanda okwa li yoo vali layambididwa nomatalashe noikumbafa komupedu presidente Nangolo Mbumba.

Nghipangelwa okwa ti ombelewa yaye otai twikile nokuyambidida ovakainhu kewalanda ashike omhumbwe yoshimaliwa ina shiwana osho unene tashi imbi kewalanda kukale oipumbiwa ya wana.

Okwa ti indila moshiwana kwau e na ehalo lokuyambidida ovakainhu ve li kewalanda opo oshiwana shikwatafane nombelewa yaye. 

fhamalwa@nepc.com.na