ONGWEDIVA-Omunambelewa wepupa Isai Iyambula okwa kumaida ovakulupe opo va kwate nawa oshifilinga shavo shopendjela molwashi otava ka kwata ashike opendjela momudo tau ya.

Okwa ti omwedi ou ovakulupe otava kwata oshimaliwa shoN$2800 mwa kwatelwa shomwedi Desemba onghee oshiwana na shi kwatwe nawa nokulongifa moipumbiwa ya fimana meumbo.

“Otwa didilikwa ovakulupe vamwe hava fiki muDesemba vehe na oshimaliwa shaashi ina va kwata nawa oshimaliwa shavo,” Iyambula ta ti.

Okwa ti oshimaliwa na shi longifwe okulanda oikulya yomeumbo noidjalomwa ndele ha ku ka landa oikolwifa keendingosho.

“Ovakulupe tava longifa oshimaliwa shavo momalodu nava lopotwe keembelewa doukashike kookanhu opo va pewe ehongo nouyelele nghene oshimaliwa sha pumbwa okulongifwa. Ovanhu tava longifa nai oshimaliwa shovakulupe momaumbo nava lopotwe opo va ka tukilwe onghatu yopaveta,” ta ti.

Onghee okwa kumaida yoo vali ovakulupe opo va xulife po oku ya keendingosho tava ka landa omalodu molwashi oshapuka notashi ulike efano lii ngeenge komukulupe ta lande omalodu.

Iyambula okwa kumaida yoo vali oovene veendingosho opo va xulife po okuyandja eengele kovakulupe ngeenge va hala okumwa omalodu.

fhamalwa@nepc.com.na

Caption: Kwateni nawa oshimaliwa sheni… Efano ota li ulike ashike omukulupe

Efano: Festus Hamalwa