ONGWEDIVA - Ovanadolongo komavyulonghalo onghee tava twikile nokulihonga nondjungu momaifano a yooloka opo va dule okupita nokumona ounongo.
Oshivike sha dja ko ovanadolongo vahetatu ova djala omanguwo konima eshi va mana okulihongela eifano lokuteleka oikuki noshoyo omadeulo okulonga meetenda dopoivilo ya yooloka.
Ava ova weda komuvalu wovanadolongo ve dulife po20 ovo va mona eedjapo eshi va mana elihongo lavo koiputudilo ngaashi NUST naUNAM, oshoyo ve li o29 va pewa eedjapo eshi va pita eetundi dotundimbiibeli kevyulonghalo laWindhoek.
Moshipopiwa shaye onambelewa kevyulonghalo laWindhoek Assistant Commissioner Julia Nauvinga, okwa ti omavyulonghalo otaa twikile nokuyandja eemhito kovanadolongo opo va kale tava kufa ombinga momadeulo ile tave lihongele omaifano a yooloka.
“Okukala modolongo itashi ti kutya omunhu ita dulu vali okulihonga. Onghee osha fimana ngeenge ovanadolongo tava pewa omhito yokulihonga,” ta ti.
Okwa ti komesho eifano lokuteleka oikuki olo limwe tali ka kala oshitopolwa shomaifano moshiputudilo shopaungoba, onghee ovanadolongo vahapu otava ka mona omhito yokulihongela okuteleka oikuki.
Okwa weda po ta ti omavyulonghalo okwa taalela omashongo oikwafifo inai wana okulongifa ngeenge ovanadolongo ve li meetundi noshoyo ovadeuli inava wana okuyandja omadeulo kovanadolongo.
Omukulunhu woshikondo shomavyulonghalo moNamibia General Commissioner Raphael Hamunyela okwa ti ovanadolongo otava longo oilonga tai hokifa komavyulonghalo ngaashi okuteleka eemboloto, okulonga moikunino younamapya i li momavyulonghalo noshoyo oinyangadalwa ya yooloka.
“Paife ihatu longifa vali ovanhu tava di kondje molwaashi ovanadolongo vetu ova deulikika nove na ounongo wokulonga oinyangadalwa ya yooloka,” Hamunyela ta ti.