ONGWEDIVA-Ovanhu va kutwa okulonga okafimbo moCensus otava nyenyeta kombinga yoikwafifo ina wana okulongifa onghee ova ti otava longo noudjuu.
Otava nyenyeta tava ti koikandjohoololo imwe ka kuna sha eetuwa da wana okulongifa.
Census ehango ha li ungaunga nokuvalula ovanhu moshilongo omo ovanambelewa ve li hanena moikandjohoololo tava ningi omavalulilo.
Ovanhu otava ka tamekwa okuvalulwa momafiku 25 fiyo 6 Okotoba.
Omunambelewa umwe ta longele moshikandjohoololo shaShikunde okwa hokolola ta ti ka shipu okulongela momufitu muhe na oikwafifo ya wana.
Okwa weda po ta ti ina va pewa noukalata voilonga ovo tava yandje ouyelele kutya otava longele oCensus onghee okwa ti oshidjuu okupewa epitikilo koovene vomaumbo vaye momaumbo avo.
“Ohatu pulwa oukalata voilonga ngeenge hatu i momaumbo ovanhu, onghee ngeenge ka tu vana ihatu pewa epitikilo,” ta ti.
Omunambelewa umwe ta longele koshikandjohoololo shaPembe okwa ti ova taalela eshongo lomashina ta teka noshoyo eembapila da pwapo ngeenge tava longo.
Omukulunhu woCenus moshitukulwa shaHangwena Eino Mwatamele okwa koleka ta ti oshikandjohoololo ashike shaPembe shi na omhumbwe yoyeendifo ashike oikandjohoololo imwe oina eetuwa da wana.
Okwa yelifa ta ti moshitukulwa shaHangwena omu na eetuwa 137 tadi longifwa moikandjohoololo aishe.
Mwatamele okwa ti ovanhu vamwe ova pewa oukalata voilonga ashike vamwe ina va pewa molwashi eshina lokulonga oukalata ola teka.
“Otwa tuma omadina ovanhu koWindhoek opo vaka ningilwe oukalata onghee ngeenge oukalata ova pu ohatu keva tuma koindjohoololo ya yooloka,” ta ti.
Okwa yelifa ta ti ovanhu ova taalela yoo vali eshongo lomashina okuninga eembapila taateka.
Mwatamele okwa ti ova taalela yoo vali eshongo lovanhu tava fiye po oilonga konima eshi va pewa omadeulo molwashi va mona oilonga imwepo.
Omupopiliko wehangano loCensus Iipumbu Sakaria okwa ti ove li pyakidila nokuyandjaneka eetuwa koikandjohoololo ya taalela eshongo loyeendifo.
Onghee okwa ti otava kwashipaleke kutya omashongo a taalelwa kovanambelewa otaa kandulwa po diva opo ovanhu va longe noupu.
“Ovanhu vamwe otava fiye po oilonga yoCensus shaashi va mona oilonga imwepo tai kalele ngaashi mopolifi nometanga leameno,” ta ti.