ONHUNO- Kakukutu kopolifi Inspector General Joseph Shikongo okwa ti ovanhu tava nyenyeta kombinga yeemilliona N$8.3 odo da longifwa okutunga etala peinda lopolifi pOnhuno nava kwatafane nombelewa yaye opo va pewe ouyelele womondjila.
Okwa weda po ta ti ombelewa yaye oye li longekida okukala ya yandja ouyelele womondjila koshiwana.
Shikongo edi okwe di popya onghela elikwatelela kombinga yoshiwana tashi nyenyeta kutya etala olo ina li tungwa shi li keemilliona N$8.3.
Oshivike sha djako minista woikwameni nomataulukilo okeengamba Albert Kawana okwa patulula etala pambalewa peinda lopolifi pOnhuno moshitukulwa shaHangwena.
Kawana okwa popya ta ti etala ola tungwa kongushu yoshimaliwa sheemilliona N$8.3. Naashi osha eta oshiwana opo shi kale tashi nyenyeta kutya oipupulu ya popiwa shaashi eemilliona N$8.3 odihapu nokutunga etala olo.
Ovanhu otava ti etala ita li ulike la tungwa kongushu yoshimaliwa sheemilliona N$8.3 shaashi oshimaliwa oshihapu.
Shikongo okwa lombwela Kundana ta ti eemilliona N$8.3 oda longifwa pamikalo da yooloka pefimbo lokutunga etala.
Okwa ti peinda olo opa tungwa eembelewa da yooloka, oundjuwo noshoyo okulonga opate ya enda peinda.
Okwa ti ombelewa yaye oi na omikanda da yela tadi ulike kutya oshimaliwa osha longifwa nge ipi.
Okwa kumaida oshiwana opo shi xulifa po okutandaveleka ouyelele woipupulu tau pukifa ovanhu kutya etala ina li tungwa shili keemilliona N$8.3.
Okwa ti okwa dengelwa eengodi nokutuminwa omatumwalaka koshiwana tashi pula ouyelele kombinga yoshimaliwa sha tunga etala.
“Ovanhu vamwe onde va nyamukula nale keengodi davo kutya oshimaliwa osha longifwa nge ipi konima eshi va pula nge.