OMUTHIYAGWIIPUNDI – Aapashiyoni mboka ya li ta ya zi nenge yu uka moshikunino shiinamwenyo ohela oya li ya dhikwa pomweelo gwaAnderson ngoka gu li pOkaukuejo uule konyala wowili yu udha oshoka anuwa iipatululo kaya li yi wetike. Uuministeli wOmidhingoloko nUupashiyoni konima owa li wa gandja ombili molwa oshiningwanima shika shi sitha ohoni.

 “Uuministeli owa hala okugandja ombili koshigwana ashihe. Konyala uule wowili omweelo gwaAndrson gwoshinkunino shiinamwenyo shEtosha ongula yonena (ohela) ogwa kala gwa pata. Omweelo ogwa li gwa egululwa potundi 07h07 ndele hapo 06h25 ngaashi shito,” osho omushangwa ngoka gwa za kuuministeli gwa pitithwa komupopiliko Romeo Muyunda gwa ti ngaaka.

Omathano oga li gi ihanene omapandja gosocial media, moka kwa li taku ti anuwa aapolisi oya kanitha iipatululo.

Ashike Muyunda ka li ta vulu okukoleka ngele iipatululo oya li ya kana nenge hasho.
“Otatu gandja ombili omolwa oshinima shika osho wo uuwinayi wa etwa koshiningwanima shika. Iipatululo yopomweelo ohayi kala kaapolisi mboka oyo ye na oshinankugwanithwa shetonatelo lyoshikunino ashihe,” omushangwa tagu ti ngaaka.