Omupevi minista Veikko Nekundi okwa gandja uutemba uuyali wa nuninwa mboka yeli mompumbwe unene, moshikandjohogololo Etayi moshitopoliwa shaMusati.
Nekundi okwa yambindhindha ngaaka oku za mondjato ye. “Uutemba mbuka ka wuna mwene natango, ihe onda hala wu gandjwe kwaamboka yeli lela mompumbwe nomuunyengwi, opo wu ya yambindhindhwe okweenda,” ta popi ngaaka. Ta ti, okuna ontseyo kutya moshikandjohogololo Etayi omuna aantu oyendji yena uunyengwi wo kweenda no taya pumbwa omayambindhindho.
Ta ti, ekupa kashona ekuhinga omwenyo.
Nekundi okwa gandja uutemba esiku kwali ta po pitha oshigwana noku shi kuthila ko kondjokonona yoshilongo sho kwali kwa ndhimbulukiwa noku tyapulwa esiku lyemanguluko lya piti, moshikandjohogololo Etayi, mOlyomakaya.
Kansela gwoshikandjohogololo Etayi Hans Haikali esiku ndyoka okwa kwashilipaleke kutya uutemba mboka otau gandjwa kwaamboka yeli lela mompumbwe.
“Otuna omusholondondo, no twa ndhindhilika nawa aakalimo yetu mboka yena uunyengwi woku enda, onkene otashi kala oshipu okuya totha mo opo ya mone uutemba wa wo,” ta po pi ngaaka. Kansela okwiindile wo aaleli yalwe oshowo omahangano ga kuthe oshiholelwa oshiwanawa shoku yambindhindhathana.
Ta ti, oonkalo ndhimwe odha pumbwa omayambindhindho opo dhi lunduluke omolwa uunyengwi yamwe ya taalela nonkalo odhigu.
“Otandi pandula no peha lyaamboka taya ka mona uutemba mbuka, shoka omupevi minista Nekundi a ningi osha simana no tashi ka lundula oonkalo dhaanelago mboka,” ta pandula ngaaka.
- vkaapanda@nepc.com.na