ONGWEDIVA- Ovakwashiwana moshikandjohoololo shaKongo otava nyenyeta kutya omhumbwe yokuhe na oitaashi yopolifi oya eta opo va kale oihakanwa yoimbuluma, unene yomahepeko omomaumbo.

Oshivike sha djako Kundana okwa talela po omikunda da yooloka moshikandjohoololo shaKongo omo ovakwashiwana tava ti ohava ende oinano ile ngeenge tava ka lopota oimbuluma ya ningwa momikunda davo.

Mekulu Martha Nghiidipaa womokunda Olukula okwa hokolola ta ti oku na ounona vaye hava kala tava hepekwa meumbo ashike ke na kutya ota ka lopota peni molwashi opolifi oi li kokule modoolopa yaKongo ashike.

“Ame onda kulupa, kandinasha nongodi yopeke yokudengela opolifi ngeenge pena oshimbuluma sha ningwa,” Nghiidipaa ta ti. Onghee okwa ti eshi eshongo linene va taalela. Johannes Mwandingi okwa hokolola ta ti ombudi woimuna owa hanya momukunda wavo omo ovanhu hava kala tava shingipo oimuna yovanhu nokulandifa kovalandifi woupana.

Okwa ti ngeenge ova kala ve na oshitaashi shopolifi otashi va kwafele okulopota oimbuluma pefimbo.

“Otuna ounona vahapu va ninga oihakanwa yomakwatonghonga noshoyo omahepeko omomaumbo ashike ohai lopotwa kwa lata,” Mwandingi ta ti.

Okwa indila ombelewa yakakukutu wopolifi Inspector General Joseph Shikongo opo ita kale tai ningi omapekapeko kombinga yomikunda di li momhumbwe yoitaashi yopolifi.

Omwedi wa djako omunashipundi melelo lOhangwena yee oku li kansela woshikandjohoololo shaMulonga Erickson Ndawanifa okwa popile kombinga yoikandjohoololo mOhangwena ya taalela omhumbwe yoitaashi yopolifi mwa kwatelwa oshikandjohoololo shaye shihe na oshitaashi shopolifi.

Okwa didilikwa onghalo yeshongo loitaashi yopolifi ya kuma yoo vali oitukulwa ya yooloka monooli osho hashi eta oibofa i lopotwe kwa lata ile i kale ina i lopotwa. fhamalwa@nepc.com.na