Ovanafikola ve dulife 100 kofikola Oshinamunwe Combined School ova pewa oututa vokulikwafela ngeenge ve li komafimbo kehangano “I GET YOUR BACK MY SISTERS”.

Fiyo onena, eefikola nee da mona ouwa woludi eli okupitila mehangano olo.

Okwa didilikwa ovanafikola voukadona tava faule eetundi omanga vamwe ohava fiye po ofikola sha etwa komhumbwe yokuhe na oututa.

Tim Martins oku li omutotipo wehangano e li nokwa hokolola ta ti okwa tota po oshikonga shokuyambidida ovanafikola ve li momhumbwe yoututa opo ku kelelwe ovanafikola va hafaule keetundi.

Okwa hokolola ta ti ovanafikola voukadona hava fikola momikunda ovo unene va taalela omashongo oututa shaashi vahapu ihava dulu okulanda oututa. “Ovanafikola voukadona ihava kala va li va manguluka ngeenge ve li meetundi eshi hava yolwa ku vakwao ngeenge ve li komafimbo,” Martins ta ti.

Okwa ti ovadali vamwe kave na oyuuyemo onghee eshi oha shi kala shidjuu komudali opo a landele okaana kaye oututa.

“Ovanafikola vamwe ohava longifa oilapi ngeenge ve li komafimbo. Osha nyika oshiponga ngeenge omukainhu tava longifa oilapi shaashi otashi dulu okueta a kwatwe komikifi da yooloka,” ta ti.

Okwa weda po ta ti ovanafikola vamwe ohava di momikunda di li kokule needoolopa omo hashi pula opo va longife oshimaliwa sholefa ngeenge tava i keefitola va ka lande oututa.

Okwa ti ovanafikola ovo ovaleli vokomongula, onghee osha fimana ngeenge ovanafikola voukadona tava yambididwa noututa opo va kale ve na omukumo woku ya kofikola noku li honga nondjungu. fhamalwa@nepc.com.ma