Ovanhu vavali ova lopotwa va xulifa moshiponga shotuwa omanga ovanhu vatatu ova mona oshiponga.
Oshiponga osha ningilwa pUukwangula mondjila yopokati kOshakati nOkahao Omaandaxa efimbo longula.
Oonakufya ova tongololwa ovo Forman Gerson Shetu weedula 30 omukalimo womomukunda Ongombeyaola naMateus Ndailikana weedula 17 omukalimo womOshakati molukanda Oshoopala.
Omupopiliko wopolifi moshitukulwa shaShana Inspekta Frieda Shikole okwa hokolola ta ti otuwa omo kwa li mwa londekwa ovanhu vahamano oya topa elola nokualangata.
Otaku hokololwa kutya otuwa ei okwa li tai di mOshakati ya uka kOkahao nokwa li ya londeka ovanhu va pitilila.
Opolifi oya hokolola tai ti omushingi omulumenhu weedula 27 wotuwa yoToyota okwa li ta shingi ehe na omukanda noshoyo okuya kondje yomhango yomeendjila eshi kwa li ta shingi otuwa ya londeka ovanhu va pitilila.
Otaku hokololwa kutya omushingi wotuwa ina mona oshiponga onghee ota ningilwa omakonakono kopolifi.
Ovanhu va mona oshiponga ova tambulilwa moshipangelo shaShakati tava mono epango lopaunamiti.
Opolifi oya kumaida oshiwana opo shi xulife po okushinga shihe na omikanda molwaashi osha nyika oshiponga ngeenge omunhu ta shingi ehe na omukanda.
Oshiwana osha kumaidwa yoo vali opo shi liufe komadidiliko omeendjila a tulwa po noshoyo okulikelela okushinga va kolwa.