OKALONGO-Omukuluntu gwongundu Popular Democratic Movement (PDM) McHenry Venaani okwa ti, ngele a pewa ompito yoku lela, epangelo lye otali ka nduluka oondhopi dhi thike po milliona 1 kehe omwendhi, momukunda kehe.

Venaani okwa popi ngaaka Olyamakaya sho kwali a ningi oshigongi kOkalongo moshitopolwa shaMusati.

“Moshilongo shetu otuna mo omahangano gaali omanene haga nduluka oosamende, dhoka tadhi vulu okunduluka ootona dhi vule po 38 dhoosamende. Oosamende ndhoka odha gwanwa okulongithwa komuNamibia kehe uule womimvo 1000 na sha,” ta fatulula ngaaka.

Ta ti, epangelo lye otali ka eta po omulandu kutya, kehe mo Mukunda, omwendhi kehe na mu kale hamu ndulukwa oondhopi omilliona 1.

Epangelo otali ka yambindhindha aanyasha taya ka nduluka po oondhopi ndhoka noosamende ndhoka tadhi ka ningwa okuza komahangano ngoka gaali omanene.

“Sho ta tu ka nkondopaleka okuya po noosamende noondhopi ndhoka, ota tu ka hulitha po onkalo yoombashu oshowo omalukalwa ngoka taga monika nayi moshilongo shetu,’’ ta po pi ngaaka.

Venaani okwa po pi ta ti, okwa ndhindhilike kutya Namibia okwa taalela eshongo enene, lyomuloka ihaagu gwana.

Ta ti, epangelo lye otali ka pomba omeya okuza mefuta enene lyoAntlantic Ocean, ngoka taga ka o palekwa noku kuthwa oshimongwa, e taga pombelwa mokanala kaRuacana.

Ta ti, kehe omukunda otagu ka kala guna ondama yomeya.

“Otandi ka kandula po ompumbwe yiikulya, sho tandi ka gandja omayambindhindho kaanafalama yiikunino opo ya vule okwiiyambindhindha,’’ ta po pi ngaaka. Ta gwedha po ta ti, sho taka yambindhindha ngaaka otaka gandja iilonga moshigwana.

Ta ti, ota gandja wo iikwathilonga yilwe, opo oshigwana shi tameke okwiilongela noku eta po iikulya okupitila muunafalama, opo Namiba a hulithe po okulanda iikulya yoomilliona kiilonga yokondje.

Vennani okwa ti, natango oshigwana osha taalela omashongo ga yooloka, ngaashi miipangelo yepangelo.

“Aanuuvu miipangelo otaya kala oowili noowili momikweyo itaaya ya kulwa, shoka sha pumbwa okulundululwa,” ta popi ngaaka.

Ta ti, aantu moshilongo oye li mo ashike oomilliona ndatu, ihe epangelo olya nyengwa okugandja omayakulo.

Ta gwedha po kutya epangelo lye otali ka lundulula onkalo yopalasitaamolo ndyoka hayi gandjwa ku kehe gumwe tayi koshipangelo, kaashina kutya omuntu ota ehama shike.

“Itandi kala noshigwana shandje kaashina omalukulwa, oshigwana shandje otashi ka kala shina uumwene wevi,’’ ta popi ngaaka.

Ta ti, otaka gandja okakalata kafa okamutse koshilongo hoka taka ka ulika kutya omuntu okwa mona opolota.

Venaani ta ti, kehe omuntu ha mono iiyemo yili kohi yoshimaliwa N$5 000 otaka pewa opolota, sho shoka moPDM taya popi kutya kehe ezimo nopolota.

“Otandi kwashilipaleke kutya mepangelo lyandje, ehumbo komeho otali tameke moshitopolwa shaMusati,’’ ta popi ngaaka.

Okwa lombwele aapulakeni esiku ndyoka kutya na ya kale ya kotokela oongundu ndhimwe oshoka opo ta dhiya nomauvaneko gaashi go shili.

Ta ti, ngaashi yuuvite kutya Venaani okwali koshitopolwa shaMusati nayo otaye keya niigongi, taya lombwele aanamukunda kutya, Venaani okwa hala oku eta iita moshilongo.

“Ngame itandi eta iita moshilongo shetu, ngame omulumentu gwombili, kandina esiku ndi landithe po oshilongi shika,’’ ta uvaneke ngaaka.

Venaani ta ti, ngele oye ya ko kune, ya lombweleni kutya inaya popya “Iimwakumwaku” ihe naya popye kutya otaya ka lundulula ngiini oonkalo dhaakwashigwana.

Ta gwedha po ta ti, okwa hala okuindila ongundu Swapo kutya, oya hala omahogololo ga manguluka, ga yela go gaana eyindhopo mo lya sha.

“Otwa hala omahogololo gena uuyuki naantu taya hogolola ya manguluka,’’ ta ti ngaaka.

Okwa indile wo omupeha presidente Netumbo Nandi-Ndaitwah opo a tseyithile epangelo lyaAngola lyihulithe po onkalo yoku hogolola moNamibia.

Ta ti, aanamibia naya kale taya ningi omahogololo gawo pwaana eyindhopo mo lyaakwiilongo.

Venaani okwa indile wo aaleli yoongundu dhilwe ya hulithe po okumupopya nayi.

“Etheni Venaani no PDM, ka shili onkalo yandje yoku popya aakaluntu yoopolitika aakwetu, ihe onda hala shi hulithwe po,’’ ta popi ngaaka. Ta ti, oyendji ya toto oongundu dhopa politika, oya zi koSwapo, ihe oya zi ko sho ya ndopa okumona omahala ngoka yali ya hala.

Ta gwedha po ta ti, nena otaya uvaneke oshigwana kutya otaya ka eta elunduluko.

“Oto ka e ta elunduluko ngiini ngele owa kala wuna ompito ombwaanawa sho wa li moSwapo ihe owali wa nyengwa oku e ta elunduluko, ‘’ ta pula ngaaka.

Venaani okwa ti, konima yomimvo 10, mboka ye ya po noongundu dho pa politika oyena okushuna koSwapo ngaashi ya kwawo.

- vkaapanda@nepc.com.na