Taimi Haihambo

OSHAKATI – Osaala oyo hai kala ya nuninwa ovanhu ava ve li monghalo itai nuwa omeva ya shiivika nawa onga Intensive Care Unit (ICU), oi li peepelesenda 90 opo i pwe.

Osaala ei vati oya pula eemilona N$35 opo idule oku manifwa , noya teelelika vati ikale yamanifwa nokunangala mo22 Novemba 2025.

Ovanaudu ava hava kala ve li monghalo ya pumbwa osaala ei koshitolopowa ashishe shanooli, vati ohava tumwa koWindhoek va ka mone ekwafo.

Pefimbo lomapekaapeko e na sha nonghee ovatungi tave shi endifa a li a ningwa komukulunhu wouhaku moshilongo, Penda Ithindi okwa ti osaala ngeenge oya pu otai kala ai tambuliwa ovanhu aveshe ve li meenghalo ita dinuwa omeva moshilongo.

“Onda pandula unene kova pewi vokondalaka ei eshi veli paka mo moilonga yavo opo vadule oku manifa etungo pefimbo. Ashike nande ongaho kwaai ishona yafyaalako, kendabaleni mukale mweimana pefimbo, opo muha kwate oilonga yovapangi neendokotola moshipala,” ta ti.

O-ICU ei oyo yotete moipangelo yepangelo, yo noilongifo oya tamekwa nale okulandwa nokutulwa peenhele, opo osaala i tameke nale okulongifwa.

 Andwell Bwanawaza mwene wehangano  eli la pewa okondalaka ei, okwa yandja olupandu laye linene kouministeli wouhaku eshi wa longa noudiinini mokuwanifa po aishe oyo va li va pumbwa mokumanifa osaalala ei.

“Natango ngeenge otashiya peefuto, ouministeli owafya oshisho kutya ovanhu ova futwa nawa pefimbo,” ta ti.

-taimihaimbo2000@gmail.com