Auleria Wakudumo
Ofikola Oshakati West Primary School oya mona obesa yofikola yotete Etitano.
Ovahongifikola pamwe novadali oshoyo oohandimwe pomudingonoko ova tula okuni kumwe, va ninga wotina owotina, wokaxuxwa owokaxuxwa, fiyo va wanifa oshimaliwa shokulanda obesa yofikola.
Omukulunhufikola Aila Kavungo okwa holola ta ti ofikola oya tameka okwoongela oshimaliwa mo2017 ashike ova ka kwatwa moshipala komukifi woCovid-19.
Nande ongaho, Kavungo okwa ti ova twikila nomhangela yavo okudja mo2022 fiyo veshi pondola.
“Otwa pula ovadali ava tava dulu va kale hava kwafa N$500 mokaanha keshe, vamwe nokuli va kala hava yandje shi dulepo. Otwa kala yo nokuninga oivilo yokuongela oshimaliwa hano ‘fund raising’ omo ovadali vahapu va yandja ekwafo kutya olopashimaliwa ile oipumbiwa yokulandifwa,” Kavungo ta ti.
Kavungo okwa weda po ta ti okwoongela oshimaliwa ka shali shipu shaashi vati havadali aveshe va hala okukwafa ofikola.
Omukulunhufikola okwa holola kutya ova kala nokufuta eebesa alushe ngeenge tava twala ounona keenhele domatalele po osho hashi pula ofikola idje oshimaliwa shi hapu.
“Keshe kodula ohatu talele po onhele yonhumba nofikola. Efimbo limwe ovadali ihava kala va hafa ounona vavo tava ende meebesa dehefi dofikola ile meebaki. Efimbo ngaashi lomaudano ohali kufa oshimaliwa shihapu mokofa yofikola shaashi otuna okufuta eebesa dihapu,” Kavungo ta ti.
Kavungo okwa yandja olupandu kovahongi ovaleli vokakomitiye kovadali novadali eshi inava fya ounye okukwafela ofikola fiyo va hanga efindano.
Omunashipundi wokakomitiye kovadali Immanuel Da Costa okwa weda po ta ti okwoongela oshimaliwa alushe ihashi kala shipu.
Ohandi indile ovadali unene ava vena ounona vape pofikola opo va twikile nokuyambidida ofikola.