OSHAKATI – Aakulukandhi oya hiywa ya kuthe ombinga momathigathano gomukulukadhi dhingi ngoka taga ka kala ko momasiku 31 gaMei nuumvo.
Omugandji gomauyelele melelo lyondoolopa lyOshakati Katarina Kamari okwa ti, omathigathano ngoka ogo taga kala gotango okuningwa moNamibia alihe, notaga ka ningilwa momauliko gomazimo ngoka taga ka tameka momasiku 30 gaMei nuumvo.
“Otatu hiya aakulukadhi ayehe ye na ehalo opo ya kuthe ombinga momathigathano ngaka ya vule okuulika uunongo wokutangumuna omazimo, omizalo dhOshiwambo osho wo okuulika omithigululwakalo,” ta hiya ngaaka.
Ta ti, opo ya sindane otaya ka talika kokutangumuna omazimo nomihoko dhawo osho wo okuyamukula omapulo taya ka pulwa.
Kamari okwa ti, ngoka ta ka sindana ongomukulukandhi dhingi ota ka mona omagano goshimaliwa N$5 000, omutiyali N$3 000 nomutitatu otaka mona N$2 000.
Ta tafulula kutya oya tula po ashike oshimaliwa shoka, oshoka omathigathano ngaka opo taga ningwa lwotango, yo ya mone kutya aakulukadhi yangapi taya ka kutha ombinga.
“Ngele otwa mono kutya oyendji oya kutha ombinga, molweetho olutiyali oshimaliwa tashi ka sindanwa otashi gwedhelwa,” ta ti ngaaka.
Kamari okwa ti, sho taku popiwa aakulukandhi oomboka ye na oomvula 35 okuya pombanda, naahokanwa inaya patelwa kondje.
Ta ti, aakulukadhi Aanamibia oyo ashike ya pitikwa okuninga omayindilo methigathano ndika.
“Ofooloma yomayindilo oyi na ashike N$100. Esiku lyahugunina lyomayindilo omasiku 09 gaMei, oofooloma otadhi tulwa poombelewa dhelelo lyondoolopa mOshakati,” Kamari ta ti ngaaka.
Kamari okwa popi kutya nuumvo oye ya po nomathigathano gaakulukadhi dhingi oshoka ihaye ya pe ompito ihe ohaya gandja ashike kaanyasha, nonando oshiindingili ohashi kala shi na sha nomithululwakalo.
Maria Daniel a tseyika nawa Mukwaluvala gomOshakati, ngoka a tseyika nawa omolwuukwatya wOshiwambo okwa ti omathigathano ngoka itage mu thigi megumbo.
“Ondi na okuza ko nepapa, okutameka komuzalo, okutangumuna nokushingitha iinima yOshiwambo. Oshituthi shika ongame sha nuninwa,’’ ta popi ye ta yolo mo.
Daniel okwa pandula elelo lyondoolopa sho tali ya pe ompito nayo yam ki inyanyudhe.
-vkaapanda@nepc.com.na