Omanga uuministeli wuuhaku nonkalonawa tau kwashilipaleke kutya otau longo nuudhiginini opo iipotha yomukithi gwepulu osho wo Covid-19 ya monika koshitopolwa Erongo kaayi indjipala, oshigwana okupitula komalungula otashi pula ku patwe manga, opo omikithi dhaa tandele.
Uuministeli wuuhaku nonkalonawa, Osoondaha owa pititha omushangwa kutya okwa monika oshipotha shimwe shepulu, omanga kwa monika natango iipotha iyali yoCovid-19 maalongwa yaali kosikola Narraville Primary koWalvis Bay.
“Omuntu ngoka a monika omukithi gwepulu okwiikalekelwa, opo kaagu taandelele. Otatu kwashilipaleke kutya oompango nomalandulathano agehe oga landulwa,” Uuministeli wa nyola ngaaka.
Omukuluntu gwosikola Narraville Primary Yolandy Theron, okwa lopotele ombelelwa yomutaleli gwoshikandjo kutya aalongwa mboka yaali ya monika omukithi goCovid-19 oya ikalekelwa noye li taya silwa oshimpwiyu.
“Otatu simaneke oompango adhihe dha pumbiwa opo kwaa taandelekwe omukithi ngoka, osho wo okukwatela komeho uuyogoki,” omushangwa gwa shangwa ngaaka.
Natango oosikola dhimwe momundhingoloko goSwakopmund odha shangele aavali kutya naya sile aanona oshimpwiyu nokugwanithapo oompango adhihe okukeelela omukithi ngoka goCovid-19.
Uuministeli owa indile oshigwana shi gwanithe po oompango adhihe opo omikithi ndhoka dhaa tandale.
O Covid-19 Oshike
Sha ikwatelela kuuministeli wuuhaku nonkalonawa, omukithi nguka ohagu taandele maantu nogwa monika oshikando shotango muDesemba 2019.
Kapu na epango lyombuto yocorona Covid-19. Ihe, omadhindhiliko ogendji otaga vulu okupangwa sha ikwatelela konkalo yomunuumvu.
Omukithi goCovid-19 ohagu taandele okuza momata gomayeye uuna omuntu ta popi, ta kolola nenge ta teshima mekwatathano ngaashi okugumathana nenge okuminikathana, oshowo ko ku kwata iinima ngaashi omiyelo, iitaafula, nosho tuu, mbyoka yi na ombuto.
Ya kumagidha kutya aluhe yoga iikaha yoye oosekonde 20 nothewa nomeya taga tondoka, nenge wu opaleke iikaha yoye nothewa, kololela mongolo yokwaako nokana neyulu ya siikililwa nenge wu longithe okanasituke uuna to kolola nenge to teshima. Kaleka oshinano shoometa mbali pokati koye nayakweni oshowo ikeelela kokwiikwata moshipala, unene tuu pomesho, pomayulu nenge mokana.
-vkaapanda@nepc.com.na