Auleria Wakudumo
Ovakwashiwana vamwe moshitukulwa shaZambezi ove li monghuwo i na onghambe eshi oshipahu sha hanauna po oikunomwa yavo momapya.
Otaku hokololwa oikunomwa, unene omapungu moikandjohoololo ngaashi Old Masokotwani naLinyati ya lika po filufilu koshipahu.
Mouvidio va andjakana komalungula, omapya amwe otaa ulike a yelekwa koshipaxu. Omapungu okwa lika omafo aeshe, kuamwe okwa fyaala ashike oshiteyelo shepungu.
Nonande vahapu va li ve na elineekelo nomukumo kutya neudo oku na eloolo molwomuloka wa wana, ovanafaalama vamwe paife ova tila kutya oikunomwa yavo otashi dulika ihanaunwe po koshipaxu ngaashi sha ningilwe muApilili 2021. Oshipaxu ohashi tuka tashi endelele, tashi kwata ookilometa 200 mefiku, nosha nyika oshiponga shaashi ohashi li tashi endelele naapo tashi nambele ohapa yela meendelelo kutya nee omafo ile.
Eemuma doilya, omapungu, oilyavala ile keshe osho tashi dulu okuliwa kusho.
Omupeduminista wouministeli wounamapya nounaimuna, eeshi, omeva nomatulululo omadu Ruth Maseka okwa talela po ovakwashiwana novanafaalama ovo ve na oinima yavo ya lika po koshipaxu moshitukulwa shaZambezi. Maseka okwa talela po yo ngoloneya woshitukulwa shaZambezi Lawrence Sampofu oo a yandja ouyelele aushe koshiningwanima shoshipaxu moshitukulwa. Omupopiliko wouministeli Simon Nghipandulwa okwa holola kutya omupeduminista okwa talela po oshitukulwa shaZambezi opo a tale nghene oudjuu ou tau kandulwa po.
“Ouministeli owa tuma ovanambelewa opo va pombele moikandjohoololo ivali, ’Old Masokotwani noLinyati’ omo sha monika,” Nghipandulwa ta ti.
Oshipaxu osha nyika yo oshiponga koulifilo noimuna shaashi ihashi li ashike oikunomwa yomomapya, ashike ohashi li yo omwiidi.