Taimi Haihambo
Helao Nafidi – Kronelia Gabriel omunamido 32 okwa ti okwa waimina elihongo laye koshiputudilo shopaungoba shaValombola Vacational Training Centre, oko a li te lihongele okuhondja.
Okwa ti ye manga ina djala enguwo laye, ano a mana elihongo laye, oku na nale oshinaeta shakula shokuhondja mOshakati, hashi ufanwa Connie Designs.
Okwa ti osho shimwe shomoinaeta yakula mOshakati hashi hondjo oikutu yomaludi aeshe, mwa kwatelwa oikutu yovafuko.
Gabriel eshi okwe shi popya pefimbo a li ta yandje etwomukumo kovanafikola vokoiputudilo yee-VTC oko naye a deulwa.
“Nye inamu deulwa mu kale ovakongi voilonga, ndele omwa deulwa mu kale ovaetipo voilonga kunye vene,” ta ti.
Okwa ti ye edeulo e li a enda olo le mu kwafa a tameke oshihondjelo shaye. Vati nande kasha li shipu, okukendabala okudule okumwena, fiyo e shi pondola.
Okwa lombwela ava va djala omanguwo efiku olo kutya, mwaashi ve lihonga nava kendabale va dule okukufa mo sha tashi va etele oshimaliwa.
Vo natango nava kendabale okukala va tula omadiladilo ounangeshefa komesho, opo ashike tave shi pondola mekonomi lonena.