Osikola yokwoopaleka iilongwa yondondo 11 oshowo 12 yedhina L. Lenza Institute mOshakati Etitatu oya li ya kutha ombinga mokwoopaleka ondoolopa yaShakati.
Osikola ndjika yo-L.Lenza okwa li ya tula miilonga eopaleko melongelokumwe nelelo lyondoolopa lyaShakati.
Omukuluntu nomukwatelikomeho gwosikola ndjoka Heita Martin okwa ti, okwoopaleka ohaye ku ningi kehe omumvo, nonuumvo nguka otaya opaleke oshikando oshitiyali.
Ta ti, oya opaleke ondoolopa yawo oshoka oya hala yi kale ya yela yo ya tse wo omukumo oosikola oonkwawo mOshakati dhi kale nadho tadhi kutha ombinga meopaleko lyondoolopa.
“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo ku yandwe omikithi tadhi vulu okupitila moongaga,” tapopi ngaaka.
Ta kumagidha oshigwana shaShakati kutya, nashi kale sha tula uuyogoki komeho.
Martin natango okwa kumagidha oshigwana kutya, esiku ndyoka inali kala olyo tali opalekitha ondoolopa yaShakati, ihe nashi kale onkalondjigilile noshiholelwa shokwoopeleka aluhe.
Ta gwedha po ta ti, okwa nyanyukilwa aalongwa ye sho ya kutha ombinga nokuulika omukumo nohole yokukutha ombinga okwoopaleka ondoolopa yawo.
“Uuyogoki otawu kala po ashike uuna, kehe gumwe tewu simaneke noku wu tula miilonga,’’ ta ti ngaaka.
Ngoloneya gwoshitopolwa shaShana Elia Irimari okwa pandula onkatu ya kuthwa kosikola ndjoka nokwa kumagidha yi landulwe kukehe gumwe, opo ondoolopa yi kale ya yela.
“Onda inekela kutya kehe gumwe okwa hala ondoolopa ndjika yi hume komeho, pamukalo gomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka.
Irimari okwa li a kunkilile omuthindo kutya ekako oshinima oshiwinayi onkene uuyogoki nawu kale oshinima shotango
Uuyogoki owo nau kale tau dhana onkandangala, oshoka ehala ohali hokiwa ashike uuna lya yela.
“Omandoloma giiyagaya naga tulwe momapandaanda oshowo puuwayela, opo aantu ya vule okweekelahi uuna ye na iiyagaya pomake,” ta ti ngaaka.
Omupopiliko gondoolopa yaShakati Katarina Kamari moonkundathana noshifokundaneki shika okwa kumagidha oshigwana shi tsike omiti.
Ta ti omiti ohadhi dhana onkandangala momikalo dha yooloka, nodha simana wo monkalamwenyo yo muntu kehe.
“Omiti ohadhi opaleke oondoolopa, ohadhi gandja ombepo nohadhi koleke uundjolowele womuntu,” ta ti ngaaka.
Kamari okwa kumagidha natango oshigwana ta ti, nashi kale oshinakugwanithwa sha kehe gumwe okutsika omiti.
vkaapanda@nepc.com.na