Otjinga pe ri omiihamo avihe nozondjuriro zoruveze zohuurire tjimuna yOvandoitji kovakwatera va Namibia vya sere okuzemburukwa nokuvarwa.
Posi ya ngunda ape ri nao Otjiṱiro Otjindjandja tjOvaherero, Ovambanderu nOvakwena kanaatji sasanekwa nu katji sere okusasanekwa poo okuṱekisiwa ku nomiihamo kangamwa oruveze rohuurire yEhi rOvandoitji. Ondekurona Hirukevi Kaapama ma tja okuzirira koumue womutengwa Shipale mbwa pitire mongorambo indji Owindhoek Observer Oritjatano nda zuko.
Metjangwa rotjiuru tji matji tja: Okuingoneka omuiihamo umwe: Oumune wOrusuvero na Afrika ohunga nomazemburukiro wOtjiṱiro Otjindjandja nOunongo wondjiviro mOfrika kOmanene Kehi, Shipale ma munu kutja Otjiṱiro Otjindjandja tjOvaherero nOvakwena tji tunduuzua kombanda yomiihamo vyarwe vyoruveze rohuurire. Nu tjinene i yovakwatera va Europa. “Etjangwa ndi mari konḓonona Omahonaparerepo wa Europa mOtjiṱiro Otjindjandja tjOvaherero nOvakwena,” Shipale ma tja. Ama ṱaṱere ku iimwe yozonongo ozombyuke za Afrika nomusuvero wa Afrika Frantz Fanon ngwa munu kokutja atjihe tji matji tjitwa tja sere okurira monḓero ya Afrika arihe otjekoverwahi pendje mena romuhoko umwe.
“Otjiṱiro Otjindjandja tjOvaherero nOvakwena orupa rotjimbaharere tjOafrika Kehi kOmanene katji tjiri otjimbaharere atjiyerike,” Shipale ma tja.
“Eṱe twa rwa ovita ovingi, ovingi nu kambi tu hungira. Tu tja vi poṋa imba pena eraa ra von Trotha, eṱe oongunḓe yehungi retu.
Nambano eye ngunda ama tja Opanafrikanista ma munu kutja nambano ami hi sekame mbi karwire Ovakwanyama poo Ovambandja poo mbi karwire Ovatjona nOvatjimurenga?,” Kaapama ma pura. Na tja Shipale ma munu kutja omazemburukiro nomavarero wOtjiṱiro Otjindjandja nai nga varerwe i yohoromende ndja twapere Eyuva rOmazemburukiro wOtjiṱiro Otjindjandja omena rovavapa va Europa “eṱe ngunda amatu tja katu nokuriyandjera okuyakura oviṋa mbi mavi yandjwa i yOvandoitji”.
“Kahunga nokutja omuiihamo warive omusemba pomukwao. Ihi katjikara tjokutja omuiihamo wa uṋe ngau zemburukwe rutenga. Ovandu tji mave paha porwe okookutja imba mba yeta omuiihamo omuenene mbwi kuwo nondjuriro ve kare nomaziriro nawo,” Grace Kambatuku omuhongwa ponganda yokombanda ya Namibia, Ounama, ma tja.