Auleria Wakudumo 

Omupresidente Netumbo Nandi-Ndaitwah okwa holola kutya ounamapya oo exukamwoongo loshilongo notau yambula po eliko loshilongo. 

Eshi omupresidente okwe shi popya koshoongalele shovanafaalama hashi ifanwa Agri-outlook sha ningwa Etitatu moWindhoek. 

Nandi-Ndaitwah okwa ti ounamapya ohau yandje oyuuyemo unene kovakwashiwana vokomikunda nokuyandja oikulya yefiku keshe momaumbo. 

“Eepelesenda 70 dovanhu moNamibia ohadi xupu momukalo wokulonga oikulya pefimbo lodula osho yo mokumuna oimuna yavo. Oshili osheshi kutya ovanhu aveshe mounyuni otava xupu molwounamapya,” omupresidente ta holola. 

Omupresidente okwa ti eshi otashi holola kutya osha fimana okuhapupaleka nokuyambula po ounamapya moNamibia opo omhumbwe yoikulya i kandulwe po nokukaleka po ongushu younamapya moshilongo. 

Nandi-Ndaitwah okwa holola kutya pehovelo lomudo okwa li a talela po oukunino younamapya yepangelo moitukulwa ngaashi: Zambezi, Kavango East, Kavango West nOmusati. 

“Ondadjakondatuwaomukumo kutya ohatu dulu okulonga oikulya yetu fye vene nokukandula po ondjala moshilongo shetu. Ondi shi shi kutya ope na natango omashongo mahapu a taalela ounamapya notwa pumbwa okutula moilonga oinima ihapu opo tu lundulule ounamapya wetu,” Nandi-Ndaitwah ta ti. 

Omupresidente okwa tofa omashongo amwe a taalelwa mounamapya ngaashi: elunduluko longhalo yomhepo, engushuluko ledu, ehapupalo loshiwana, naikwao ya wedwa po. Okwa ti aishe ei otai wilike ovanamapya kutya nava kune shike momapya avo. 

“Ngeenge otwa hala okuteya onakudiwa iwa, outnaokulundulula onghalo younamapya, okudja koshikulu shonale twa uka kounamapya woshinanena. Otwa pumbwa yo okutula moilonga kutya out na okukuna oikunomwa oyo tai dulu okufinda elunduluko longhalo yomhepo, okukwafela ovanafaalama vanini naikwao,” omupresidente ta holola. 

Nandi-Ndaitwah okwa holola  yo kutya nonande ounamapya oo fimba ina ongodi meyandjo loilonga moshilongo, eemhito doilonga moshikondo omu otadi ende tadi shonopala paife molwaashi ovanyasha vamwe inava hala vali okulonga mounamapya. 

Omupresidente okwa indila ovanamapyaopovalongenoudiinini nokutula moilonga omikalo da yooloka dopauteknologi odo tadi wapalele elunduluko longhalo yomhepo nounamapya wopaife. 

oAgri-Outlook oya li koshi yoshipalanyole “harvesting the future,” osho tashi holola kutya ovanamapya ova pumbwa okulonga, okuxwaxwameka, okulundulula nokuyambula po ounamapya opo va teye oiimati iwa monakuiwa. 

-wakudumoauleria@gmail.com