Jazema Hangero

Ovanane vOtjimbumba tjOmbazu ponganda yomahongero wokombanda, Ounivesiti of Namibia, ousupi OUNAMA itji Otjiuaṋa Cultural Society, wa twa ondjoko pehi nohange nomaunguriro, omananeno nonḓoneno yawo. 

Otjiuaṋa ombura ndji tje yere poruveze orutjatatu ndu tja perwe peyuva enene romukandi wombazu rombura aihe otjotjimbumba tji tjari nondanda ombwa yombazu. Otjiuaṋa wina tja perwe ondjambi yondjingonekero otjotjimbumba tjombazu tji tji munika nawa momuzaro wombazu. 

Otjiuaṋa tja kara norupa orupame movitjitwa ovingi mbya tjama nombazu nomakuruhungi womuhoko watjo. Omayuva tji ya ri 24 Kambundu tja kakara norupa mOmazemburukiro Omatenga wEyuva rOtjiṱiro Otjindjandja kehi yOkandjoze Chiefs’ Assembly, ndji ri ombooronganeno yozombara zOvaherero nOvambanderu mongondjero yOtjisuta tjOtjiṱiro Otjindjandja. Omayuva tji ya ri 31 ku Ngarano tja kara norupa rwarwe momahongero wOtjiṱiro Otjindjandja kehi yonganda ndji Ohitambo Virtual Academy yOmutengwa Mbunga Tjamuaha, owo nga sembamisirwa pOst.Barnabasa yOveripate mOkatutura.

Mu Katjose tji ya ri 16 tja ṋangwa konganda ndji National Art Gallery okukatarera ozonḓengura nḓe notjiṋa nOtjiṱiro Otjindjandja kombunda ya nao ovahongwa va kayandja oumune wawo ohunga na mbi va tarere nokurihonga mozonḓengura nḓo. Kotjikando otjitenga otjimbumba tja toorere ouyenda kOmbu Village ku tja kakarere norupa momanyando wombazu pekepeke nu tja kakarere nokanyando komarukiro womuatje ena. Omayuva tji ya ri 17 ku Ndengaṋi tja sembamisire eyuva rokutara komapu nga nakaurisa Omaraisiro Wapamwe, OJoint Declaration pokati ka Namibia nEhi rOvandoitji ouhunga nOtjiṱiro Otjindjandja nOtjisuta pOUNAMA pu va ṋangere Omuheṋendu Mbakumua Hengari nOnongo Mbatjiza Kazondovi, Omiṱiri pOUNAMA. Mu Katjose wina Otjimbumba tjari norupa mombatasaneno yotjitjitwa tjombazu ponganda yomahongero wokombanda, indji Ointernational Institute of Management, OIUM. Kombunda ya nao omayuva tji ya ri 29 Ndengaṋi atji kayandja oruvara kotjitjitwa tjeyuva rombazu ponganda yomahongero ndji Otrumphant College mOtjomuise. 

Katjimbari Ngatutjize ngwa toororerwe otjomunane wotjimbumba wokombanda, Operesindenda, ma tja omundu auhe tja toora omerizirira we oviungura mavi yenene okurira ovipupu kotjimbumba nu ave yenene okuyenenisa ozondando zatjo ku ku ri okuworonganisa, okuṱizira ovandu vetu pamwe nokuvehonga ovyombazu yetu.