Zebadlt Ngaruka

Okuhonahona ookukavaza, omuṱuta omutanda Tjiuu Kaunatjike ma tja, ama yandja ondunge, tjinene komitanda omikwawo omiyenda poo omiute motjitamba tjouṱuta.

Kaunatjike ma ningire ovaṱuta ovaute okurirongerera okuuta kouṱiṱiṱiṱi, okukara nomuretima nokurihongera mu imba mbe nondjiviro movyouṱuta. “Ami omuini ngamba otji mbi tjita, mbi rihonga pevapayuva kovaṱuta mbe tjiukwa. O hakahana okutjita otjimariva, posi ya rikotera kokukwatisa onḓengu nomananeno nge ri wo,” ma tja. 

Kaunatjike iumwe wovatumbanḓu vakatjoruhonga wOuṱuta wa Okaundua. Ma tja ouṱuta wozonḓu ondjiri ondjira kovaṱuta ovaute, tjinene okuiisira komatokero womaryo nehi mbiri oviheṋa momahi wakangamwa. Orusuvero rwe roututa rwa uta nozombura o-16, kehi yaTjikuume we Festus Karukukutu Kaunatjike, nongundwe Felix Tjiumbu Kaunatjike. 

Ouṱuta wa Kaundua wina u tumba nozongombe nozongombo posi ya ombango tjinene u yandja kozonḓu nḓa tjangisiwa otjozombinḓu. Wa toorora Omeataster mena rokutja i nomasa, ongungutu nu i hitasana nawa nozongaro zokuti kwa Tumbonde. 

“Ozomeatmaster kaze hepa okuzezengwa tjinene. Ze tjinda oupyu nawa nu ze nonyama yonḓengu. Tjingetjo ze tjevera ozondjona nawa nu ze kwata oupupu; okusasaneka na zarwe, tji tji vatera orutumbo okuhakahana okutumbara,” Kaunatjike ma tja. 

Omatokero nge muna omaryo omaheṋa mena rokutja u ri mehi rakangamwa. Wina pe nouhepe woviungurisiwa mbya pwire tjimuna otui novyunda. Tjarwe otjikendise omahandjaukiro womitjise ozonḓu ze tji za hakayene na zarwe momaryo tjinga ombatero okuza kouhonapare mbu ri wo ai ha yenene.

“Tjarwe otjiumanise okupandjarisa ovinamuinyo kourunga, tjeri otjiihamise otjinene nu tjimwe tjomatokero omanenenene momahi wakangamwa. 

Wina tu muna omauzeu tji matu randisa oviṋa vyetu tjinga ovarande ave undjira ko kweṱe okuyarura ozopereisa zetu kehi, nokuhina okuripurira kokutja okutumba ovinamuinyo vyonḓengu tu ungura oukukutu mbu ṱe i pi,” ma raisa nao.