Auleria Wakudumo
Opolifi moshitukulwa shaKunene oya holola kutya omwaalu weengobe da vakwa nokudipawa kovafekelwa vane owa ya pombada, paife otaku tengenekwa u li po51.
Petameko, opolifi oya li ya holola kutya eengobe da hangika da dipawa odi li o30, naimwe inai hangika ya fya ashike oya tetwa omifipa opo iha faduke po.
Eshi opolifi ya ninga omakonakono a wedwa po oya, oya mona kutya omwaalu weenghwandabi da dipawa kau shi 30 ngaashi sha tumbulwa metetekelo ashike o51.
Ovafekelwa vane ova holoka momhangu yaOutjo Omaandaxa.
Ovafekelwa ova tongololwa ovo Killian Masela weedula 47, Matheus Kataeko weedula 34, Vevangapi Kambampa weedula 30 naTitus Nekongo weedula 41.
Otaku hokololwa ovalumenhu ava va shinga eengobe edi meefaalama mbali, mofaalama hai ifanwa Mountbauten osho yo ikwao yoBergvlei noku di twala moixwa omo va hangika ve di dipaela.
Ovafekelwa ova hangwa va dingula ombelela okudja keengobe odo da dipawa ndele tave di tulike koixwa opo di kukute.
Vatatu vomovafekelwa ova dimina kutya ove na ondjo mevako nedipao leenghwandabi o51 omanga umwe a holola kutya ke na ondjo moshinima osho.
Omupanguli Peingonjabi Shipo okwa undulila oshibofa eshi komafiku 10 Juli neudo.
Oshibofa osha undulilwa komesho shaashi vati sha pumbwa omakonakono a wedwa po molwouhapu woimuna oyo ya dipawa.
Otaku hokololwa yo oshibofa sha kuma ovanhu vahapu moshiwana ovo va hala oulunga weenghwandabi wa xulifwa po moshilongo.
Opolifi oya holola kutya natango otashi dulika ku tulwe vamwe moipandeko mekwatafano novafekelwa vane moshiningwanima eshi.