Taimi Haihambo
Eenhana – Oshitukulwa shaHangwena osha patululila ovakwashiwana vasho vamwepo otenga yakula yomeva, oyo tai kala hai yandje eelitela di li eemiliona 10 kovakwashiwana mefiku.
Otenga yomeva oya patululwa pambelwa kOmupresidente woshilongo Netumbo Nandi-Ndaitwah, nominino dayo dokuandjakanifa omeva oda kwatafana nomikunda ngaashi Omafo, Omakango nEenhana, ashike omeva natango okwa teelelika a ka fike komikunda dopopepi da dingilila omikunda nhatu da tumbulwa.
Otenga yo vene moshitulkulwa omo nale ya kala, ashike inai kala lela hai yandjakaneke omeva keenhele dihapu. Vati oya kala ashike hai twala omeva keenhele dimwepo, nopaife meenhele omo kwa li hamu pewa omeva paife omwa wedwa.
“Otenga ei oya teelelika i ka kale ya andjakaneka omeva kovanhu fiyo omomudo 2037,” Presidente ta ti. Omukulunhu wehangano loNamwater Abraham Nehemia, ehangano olo li la unganeka nola kwatela opoloyeka ei komesho, okwa ti omeva okwa dindwa okudilila medu nokwa tulwa oiwapaleki aishe opo a dule okunuwa.
“Natango omeva otaa kala taa dindwa okudja medu, neendama edi tadi kala tadi pungula omeva aa, oda tulwa omashina okudinda omeva oautomatika, opo aha kale e na ondova ngeenge taa nuwa kovanhu,” ta ti.
Ngoloneya woshitukulwa shaHangwena, okwa yandja olupandu laye kopoloyeka inene oyo ya patululilwa ovanhu vomoshitukulwa shaye.
“Omeva moshitukulwa shaHangwena oku li omhumbwe yakula shaashi oshitukulwa osha kukuta nai, vo ovanhu vahapu otava xupu shokadila,” ta ti.
Okwa ti otenga otai ka kwafela lela ovanhu vahapu, shaahi omeva otaa ka andjakanekwa koitopolwa ihapu.