Omukulunhuwiliki wehongo koshitukulwa shaMusati Paulus Kashiimbi okwa koleka ta ti moshitukulwa shaye omwa kutwa ovahongikola ve li 60 omudo wa dja ko muDesemba.
Kashiimbi ou opo a ulikwa a ninge omukulunhuwiliki wehongo omudo wa dja ko, okwa ti ovahongifikola ava ova tameka oilonga neudo keefikola da yooloka.
Kashiimbi okwa ti ombelewa yaye otai twikile okukuta ovahongifikola tava ka longela keefikola oku ku na omhumbwe.
“Ohandi kwashipaleke kutya keefikola oku na ovahongifikola va wana novadeulikika nawa,” ta ti.
Moshitukulwa shaMusati omu na eefikola depangelo 275 omanga eefikola 27 odopaumwene.
Oshitukulwa shaMusati neudo oshi li ponomola onhi-3 moidjemo yondodo 12.
Okwa yelifa ta ti neudo oshitukulwa shaye oshe shi endifa nawa okutambula ovanafikola aveshe molwaashi fiyo opapa kape na omunafikola a lopotwa ina mona ofikola.
“Ngeenge ope na omunafikola e li keumbo ina mona ofikola ovadali nava shivifile eembelewa dovatalelishikandjo,” ta ti.
Okwa ti elalakano opo ku talike ngeenge okaana otaka dulu okumonenwa onhele keefikola shaashi osha fimana ngeenge ounona tava i kofikola.
Kashiimbi okwa ti eefikola di li meedolopa ngaashi Okahao nOutapi odo unene da taalela eshongo leengulufikola di hadi ovanafikola molwaashi keshe umwe okwa hala okaana kaye ka fikole modoolopa.
“Eesekundofikola dimwepo nado odi na omwaalu muhapu wovanafikola unene tuu eefikola odo hadi pitifa nawa ovanafikola,”’ ta ti.
Omukulunhuwiliki wehongo okwa ti neudo ovanafikola 1 700 ova tambulwa kondodo onhi-12 osho shi li eshongo linene molwaashi ovahapu.
Okwa weda po ta ti omudo wa dja ko ovanafikola vondodo onhi-12 okwa li ve li 1 300.
“Omwaalu owa londa pombada molwaashi ovanafikola ova pita nawa ondodo onhi-11,” ta ti. Okwa kumaida ovanafikola opo ve lihonge nondjungu nosho yo okufimaneka ovahongifikola vavo.