Ovakainhu vavali ova tambulilwa moshipangelo shaNandjokwe eshi va monifwa oshiponga kookalyamupombo pefimbo va li va kofa meumbo lavo. 

Oshiningwanima osha ningwa Etitatu komukunda Emono moshitukulwa shaShikoto efimbo loufiku. 

Omukulunhu koshikondo shokunakona oimbuluma moshitukulwa shaShikoto Omupedu Commissioner Titus Ekandjo okwa hokolola ta ti ovafekelwa ova landula ovakainhu okudjakeendingoshofiyookeumbo. 

Otaku hokololwa kutya nakuninga oshihakanwa weedula 54 oku na ondingosho i li pomukunda wavo. 

Opolifi oya hokolola tai ti ovafekelwa ova ya monduda omo kwa li mwa nangala ovakainhu ndele tave va ningile omatilifo ve kwete eembele. 

Ovakainhu ova mangwa neengodi keenyala nokomaulu tava pulwa oimaliwa neeshapi dopondingosho yavo. 

Opolifi oya hokolola tai ti ovakainhu ova dengwa komitwe ndele tava xwikwa moipala. 

Nanakuninga oshihakanwa e na ondingosho okwa yandja eeshapi dondingosho kovafekelwa. 

Ovafekelwa ova nyeka ko eengodi davo dopeke ndele tava i kondingosho. 

Nakuninga oshihakanwa umwe okwe shi pondola okufaduka po fiyo okumushiinda shavo. 

Ovashiinda mokufika ova hanga ovafekelwa va faduka po nale. 

Opolifi oya ti kondingosho okwa kufwa oshimaliwa sheeN$115 omanga umwe okwa nyekwa eeN$800. 

Ovafekelwa inava kwatwa po nomakonako opolifi otaa twikile. 

Umwe womukalimo womukunda Emono okwa hokolola ta ti kave li vali meameno shaashi ope na ovalumenhu va ninga eengudu dokudenga nokunyeka ovanhu omaliko avo. 

“Ngeenge hatu di keendingosho ohatu ende tu li meengudu molwaashi twa tila okuponokelwa kookalyamupombo,” ta ti. 

-fhamalwa@nepc.com.na