KONGOLA- Likwambuyu wa likolo la makete Dr Kalumbi Shangula ufitisize pilaelo hala kuzuha kwa butuku bwa malaria mwanaha Namibia, sihulu mwa sikiliti sa Zambezi. Likwambuyu napatuluzi viki yefelile kuli Zambezi nebihile lipiho ze 3 385 ni lifu liliñwi kuzwa Sope 2025. Nabulezi hala tokwahalo yaputako kusebeza katata kulwanisa butuku.

“Malaria ifumaneha hahulu mwa likiliti ze lishumi hala likiliti ze 14 za naha Namibia. Nihaike lusebelize katata, luswanela kuzwelapili kutundamena kuli lufelise kuyambukela kwa butuku bwa malaria,” nekubulezi Shangula. Naize mungendenge wakufaela mwa mandu wa mubuso, one ukalile la 24 Muyana 2024, ki wabutokwa mwa kulwanisa malaria. 

Kono likwambuyu nafitisize maswabi hala batu babalwanisana ni mungendenge. “Buñata bwa batu bahanela babeleki baluna kukena mwa mandu abona ni kufaela, kusiya mandu abona kuba mazwalelo aminañi ni simuluho ya butuku bwa malaria,” nabulezi. 

Nakolwisize sicaba kuli mulyani obelekiswafa hautisi kozi kwa sicaba mi nakupile baeteleli basizo kutusa kubulela kwa sicaba. Kwanda zeo Shangula nazibahalize kuli kuka yahiwa sipatelanyana kwa Kongola kuli sicaba bano fumanela likalafo fakaufi.