Auleria Wakudumo
Ouministeli wouhaku nonghalonawa owa holola kutya otau ka yandja exungomenyo kovakwanedimo vopatatu, vounona ovo va dipawa omadipao taa limbilike mOkahandja.
Minista wouhaku Dr Esperance Luvindao okwa holola kutya ouministeli otau ka yandja yo omakwafo a wedwa po ngaashi oikulya, nouhaku wopaunamiti kovakwanedimo vounona ava.
“Onda hala okukwashilipaleka kutya exungomwenyo tali ka yandjwa kouministeli otali kala lopombada nohatu ka kwashilipaleka kutya otwa yakula moule ovakwanedimo ava,” Luvindao ta ti.
Luvindao okwa ti ouministeli itau ka yandja ashike exungomwenyo ndele otau ka tofa mo yo ovakwanedimo ovo va pumbwa ekwafo lopaunamiti la wedwa po ile exungomenyo opo va tuminwe kovanambelewa ovo tava dulu okuyandja exungomenyo nekwafo lopombada.
“Osha fimana okukwashilipaleka kutya otwa tofa mo ovakwanedimo ovo tava pumbwa ekwafo lopomadilaadilo ile exungomenyo la wedwa po opo vaha ka kale ve na ounghundi wopamadiladilo monakudiwa,” Luvindao ta ti.
Ouministeli owa yandja nale ekwafo lopaikulya kovakwapata vounona voukadona vatatu, Rosalind Ndinelao Fabian weedula hamano, Ingrid Maasdorp weedula nhano, naBeyoncè Kharuxas ovo va xulifa omafyo a nyanyalifa eshi va longelwa ominyonena ndele omalutu avo taa ekelwashi.