OSHAKATI-Oondjila adhihe odha taalela kokapale kemanguluko mOshakati mehuulilo shiwike sho oosipana dhaadhanitanga tadhi ka kutha ombinga momaudhano gEkopi lyaMayola ngoka taga ka kala ko okuza momasiku 01 sigo 04 gaMei nuumvo. 

Mayola gwondoolopa yaShakati Leonald Hango okwa popi kutya omaudhano ngoka otaga ka ningwa oshikando oshititano – nonumvo oya tula po oshimaliwa shoN$111 000. 

“Omumvo nguka omaundhano ngaka otaga ka kala ga yooloka komakwawo agehe ga ningwa omimvo dha piti oshoka nuumvo otwa tula po oshimaliwa shakola,” ta popi ngaaka. 

Hango okwa ti, oya topola omaundhano gokoompadhi moongundu ndatu, omanga etanga lyomokambamba lyili mongundu yimwe. 

Ta ti, ongundu yotango oyaamati yaanyasha, taku landula yaadhani tanga aakulu oshowo yaakiintu.

“Osipana yotango mongundu yotango tayi ka sindana otayi ka mona oshimaliwa N$30 000. Osipana tayi keya puutiyali, otayi ka sindana oshimaliwa shoN$15 000. Osipana ya landula ko otayi ka mona oN$5 000,” ta fatulula ngaaka.

Osipana yotango mongundu ontiyali yetanga lyaadhani aakulu otayi ka sindana oshimaliwa shoN$9 000, ontiyali otayi ka mona oN$6 000 omanga ya hugunina tayi ka mona oN$35 000. 

Hango okwa ti, ongundu ontintatu, oye tanga lyokoompandhi lyaakandhona. 

“Osipana yotango otayi ka sindana oshimaliwa N$7 000 osipana ontiyali otayi ka mona N$4 000 omanga ya hugunina tayi ka mona N$2 500,” ta ti ngaaka. 

Ongundu ya hugunina oyo mokambamba. 

Ta ti, osipana yotango otayi ka sindana N$5000, ontiyali N$3000 omanga ya hugunina tayi ka mona oshimaliwa N$2000. 

Mayola gwondoolopa yOshakati okwa ti omaudhano ngoka ogena oosipana dha za kiitopolwa ya yooloka yoshilongo, nomesiku kehe otaya ka yakula aantu ya thika 8000.

“Ekopi lyoMayola natango olya gandja ompito kaakaimo yomOshakati opo yaka ninge omangeshefelo gawo omasiku ngoka,” ta ti ngaaka.

Hango ta ti ndjika ompito ombwaanawa okukokeka eliko lyondoolopa lyOshakati.