Abraham Mwanyekange 

Omupopiliko welelodoolopa Outapi Joolokeni Haidula okwa lombwela Kundana ta ti ovalandifi vomomatala opane omOutapi ove na eendjo delelo lodoolopa da koya peemiliona N$5. 

Haidula okwa ti eendjo ode ya po konima yokorona. “Omatala Onhimbu ovalandifi ove na eendjo eemiliona N$2,9, Outapi omiliona N$1,9, Anamulenge N$533 000 omanga Olefa oi na eendjo eemiliona N$5,8,” ta ti. 

Okwa indila opo ovo ve na eendjo dodoolopa va ye keembelewa delelo opo va ka tule po elandulafano kutya otave di futu ngahelipi. “Elelo ola tula po elandulafano okukufilako ovanhu vetu keendjo davo ngeenge va futu ko kashona, onghee ovalandifi nave uye tu ye navo meenghundafana,” Haidula ta ti. Vamwe vomovalandifi vomomatala mOutapi ova lombwela Kundana tava ti ova yakulile omukanda okudja kelelo opo va kale va futako koimaliwa youtala vavo ovo i li konima. “ Otwa lombwelwa kutya ngeenge itatu futu ko otashi shiiva tu ka taatawe mo momatala molwaashi outala vetu ove na eendjo,” tava ti. 

Nalupe Lucia umwe womovalandifi womomatala okwa ti ye okatala kaye oke na eendjo N$14 000 omanga Naemi Martin ye okwa ti okatala kaye oke na eendjo N$12 000. Ovalandifi ova ti eendjo odo ode enda tadi hapupala eshi okorona kwali ye liteyela moNamibia. “Konima yokorona ongeshefa oya shuna pedu neekastoma kadi po vali nonghee ohatu nyengwa okufuta outala vetu,” Martin ta ti. Martin okwa ti ovahala elelo lodoolopa opo li kufe mo ovo tava landifile momapandavanada navo ve uye komatala nongeenge hasho navo otava yi ashike momapandavanada. 

Haidula kombinga yombaapila okwa ti odanakalindi. “Inatu va lombwela kutya momatala ohatu va kufamo ngeenge itava futu eendjo davo, kape na oushili mwaasho,” ta ti. 

Okwa weda ko ta ti mopaife elelo otali ka kufa mo aveshe ovo ve li momapandavanda va ye komatala ape mefimbo lixupi. 

“Ovanhu aveshe naavo hava landifa mOmaandaxa osho yo Etitano oko hatu va tula komatala ape opo ashike ovanhu vetu hatu va kombo noshikombe shimwe,” ta ti. 

Haidula okwa indila opo ovashingifi va fute outala wavo alushe molwaasho ovena ombilixa neenghono komwedi ta ti ohava futilwa ashike N$300. 

-abbenghilai@gmail.com