Abraham Mwanyekange
Omundokotola Akutu Munyika okwa lombwela Kundana ta ti pauhaku omunhu ngee okwa tetwa ile e liteta oshilyo shaye sholutu ndele tapu piti efimbo nena ohai ka xwikwa po ashike.
Munyika odo okwe di popya konima eshi taku hokololwa omulumenhu weedula omi-40 womomukunda Emono mOkatana moshitukulwa shOshana e liteta oulumenhu waye omwedi wa dja ko. Munyika okwa ti ngaashi oulumenhu ihau shunwa po ngeenge owa dengwa komepo molwaashi kau na vali eshi tau ka longa. “Omunhu oha hondjwa ashike tapatulwa okapaipi opo a dule okuxuxwa ngee oushitwe tau pula ndele ta pewa omiti,” Munyika ta ti.
Omulumenhu e liteta oulumenhu waye
Omulumenhu weedula omi-40 womomukunda Emono mOkatana moshitukulwa shOshana otaku hokololwa e liteta oulumenhu waye Omaandaxa oshivike sha dja ko efimbo longula.
Ndapandula Shithigona omumwainakadona wanakuliteta okwa lombwela Kundana ta ti oshiningwanima osha ningwa mOmaandaxa oshivike sha dja ko ongula pokati kotundi onhimuwoyi fiyo 12 yomutenya.
Ta ti Omaandaxa okwa dja meumbo ongula pomuwoi a ya kodoolopa ashike ota dimbulukwa a popya namumwaina manga ina dja mo meumbo.
“Eshi nda ka aluka kodoolopa Thomas ou e na onduda i li metungilo limwe naMathew okwa ifana nge ndele ta ti okuwete ohonde taikunguluka okudja mokandjuwo kavo osho yo moseti, konima eshi twa tala nawa otwa mona ohonde kutya oyadja monduda yaMathew,” ta ti.
Okwa weda ko ta ti eshi ova kendabala okuya monduda yaMathew ndele ova mona kutya okwe li patatela mo, ta ti konima ova ka tatulamo ekende londuda yaye.
“Otwa tatula mo ekende ndele hatu mono kutya omo e li, e li kombete mekungu lohonde,” ta ti. Okwa ti ova ifana ovakwanedimo ndele Mathew ta twalwa moshipangelo oko e li ta mono ouhaku mopaife. Ndapandula okwa ti Mathew oku na oupyakadi wopamadiladilo a tameka nao mo2021. “Kandi shi kutya oshike hashi hange mumwameme molwaasho nomo 2023 okwa li a kendabala okulikufa omwenyo natango.
Ndapandula okwa lombwela Kundana ta ti mumwainamati oku li po xwepo paife nonande e li momake eendokotola mOshakati.
Komufala wopolifi woshitukulwa shaOshana Lungameni Sakaria okwa koleka oshiningwanima ta ti oulumenhu owa diwa ko nao ketanga lopolifi.
Lungameni okwa kumaida ovanhu opo va file oshisho ovakwapata vavo.
Omundokotola Rubeni Kanime okwa ti osha fimana unene okulwifa oudu wopomadilaadilo.
“Nonande epangelo otali kondjo okulwifa oupyakadi ou, ova kwapata navo ova pumbwa okuyambidida ovanhu vavo shidulife oku eli teeka,” ta ti.
Kanime okwa ti oudu wopomadilaadilo ohau ponokele unene ovanyasha.
“Ovanyasha vehe na oilonga ovo va ninga oshihakanwa shomukifi ou, molwaasho otava nyengwa okuliwanifila po eemhumbwe davo,” ta ti. Tati ovanyasha ohava tameke nee tavalongifa omalodu noingangamwifi nai sho osho nee hashi eta oku kala omunhu ehenakonasha vali monghalamwenyo yaye.
*Edina Tomas naMathew ola longifwa ashike mehokololo.*
-abbenghilaigmail.com