ONGWEDIVA – Ovanadolongo 5 946 ova mana okulihongela omaifano avo nova mona omapapa manga ve li momandiki evyulonghalo pokati komudo 2016 fiyo 2023.
Ava, ovamwe vomovanadolongo ve li 8 079 ovo ve lishangifa meepologalama da yooloka dehongo lopombada manga ve li momandiki evyulonghalo ngaashi, Hardap, Divundu, E. Nepemba, Oluno, Walvis Bay, E.Shikongo nomoWindhoek.
Omuvalu munene womovanadolongo ava otau lihongele oushiviveta.
Omunambelwa welongo meedolongo nomavyulonghalo moNamibia Samuel Hamukoshi okwa tumbula kutya eedolongo moshilongo odi na ovahongi vokoiputudilo yopombada ve lihongela omaifano a yooloka, nohava longo ovanadalongo tave lihongele omaifano e li nokuli li.
Okwa tumbula yoo kutya ovanadolongo ava ve li mondodo 11, ohava futu ashike omalishangifo opetameko lodula oshoyo oilongwa yavo, yoo oministeli yehongo ta i futu omakonakono.
Oimaliwa ei ohai futilwa ashike omwaalu umwe po wovanafikola shaashi ohava kala vahapu, shoo oshikefa shepangelo nasho otashi endekele ombimbinga imwe, Hamukoshi ta ti.
Ovakayulinyanga novafekelwa ava vati ohava futilwa ku NASFAF ngeenge va wanifa oitwa. Hamukoshi okwa weda po yoo kutya natango ohava pewa oshimaliwa shomondjato “none-tuition fee” osho vahapu hava longifa oku landa eekombiyuta davo oshoyo eemhumbwe adishe odo hava pumbwa pefimbo tave li hongo.
Hamukoshi okwa twikila yoo kutya omandiki evyulonghalo amwe okuna eengulumambo omo ovanadolongo hava dulu oku indila omambo va longife.
Okwa popya kutya eengulumambo dodolongo kadi na omambo eli xwapo, novanadalongo ohava twalwa keengulumambo dokondje yodilongo opo va dule oku mona omauyelele aeshe va pumbwa.
“Ovanambelwa vehongo alushe oha vafi oshisho opo va yandje omauyelele ena sha nomalunduluko mape ena sha nehongo, opo ovanadolongo vadule oku endela pamwe nefimbo, Hamukoshi ta ti.
Okwa twikila yoo kutya nonande ovanadalongo tava kendabala oku xwepo paleka eenghalamwenyo davo, natango ohava taalele omashongo ena sha nelihongo lavo. Vahapu vati kave na oikwafifo yawana ngaashi ouyelele wokomalungulula, eekombiyuta, omambo loo nefimbo lavo ola ninipikwa oku mana oilonga yavo yofikola.
Okwa twikila ko yoo kutya ovanadolongo ova pitikwa ashike okulongifa eekombiyuta okudja po hetatu youngula fiyo opo nhee yokomatango Omaandaxa fiyo Etitano.
“Ovanadolongo natango ihava mono efimbo lawana oku popya novahongi vavo opo va dule okupukululwa.
Omashongo aa oha kala endagalati lakula melihongo lavahapu,” Hamukoshi ta tumbula.
Hamukoshi okwa popya kutya neudo ove na ovanadolongo vafika po puvaheyali vadjala omanguwo okudilila koiputudilo ngaashi NUST, UNAM, Stadio Namibia.taimihaihambo2000@gmail.com