Omupopiliko wouministeli womidingonoko, ovapashioni nomifitu Vilho Hangula okwa kumaida ovadali hava di komidingonoko oko kwa lopotwa kwe liteyela eendjaba opo va findikile ovanafikola kofikola.
Okwa yelifa ta ti unene tuu ovanafikola ve li meendodo dopetameko ova pumbwa okukala ve li metonatelo lovadali vavo.
Hangula natango okwa kumaida ovadali opo va popye nounona komaumbo va kale kokule neendjaba shaashi oda nyika oshiponga.
Edi okwe di popya ta ti okwa didilikwa ondjaba ya lopotwa koshikandjohoololo Elim Etitatu ashike kape na omunhu a lopotwa a monifwa oshiponga.
Oshivike sha dja ko okwa lopotwa omukainhu weedula 46 a dipawa kondjaba komukunda Omugulugwombashe kOmusati.
Kansela woshikandjahoololo shaNesi Festus Simon, naye okwa popya ta ti komukunda Onandjadja okwa monika eendjaba hetatu Etivali efimbo loufiku tadi ende momapya.
Kansela okwa koleka ta ti eendjaba oda hanauna po omapya ovanhu osho yo eedalate domakove.
Okwa ti ovanambelewa va dja kouministeli womidingonoko ova lopotelwa nale kombinga yeendjaba edi ndele tava fiki nelalakano lokukaleka po eameno loshiwana.
Kansela woshikandjohoololo shaTamanzi naye onghela okwa popya moradio yo-NBC ta ti moshikandjohoololo shaye omwe liteyela eendjaba. Hangula okwa ti oshiwana na shi kale tashi pwilikine oradio nbc molwashi ouyelele uuhapu kombinga yeendjaba otau kala tau yandjwa okupitila koradio.
Hangula okwa kumaida oshiwana opo shi kale kokule neendjaba shaashi otadi dulu kukala da nyika oshiponga.
“Oshiwana inashi pumbwa okushikula eendjaba ile okudenga eendjaba. Ondjaba oya nyika oshiponga ngeenge ya shindwa,” ta ti.
Okwa ti ovanambelwa ove lilongekida efimbo keshe okukala va fika koshiwana ngeenge sha lopota eendjaba di li komikunda davo.
“Oshiwana nashi lopotela opolifi ile eembelewa dokaansela ngeenge sha mona eendjaba momikunda davo,” ta ti. Okwa yelifa ta ti kape na omukwashiwana a pitikwa okudipaa ondjaba molwaashi osha puka notashi eta omunhu a kwatwe po.
Ovanhu vatatu ova holoka momhangu yaKahao Omaandaxa konima eshi va kwatwa po shaashi va yasha ondjaba ndele tai lemana komaulu. Keshe umwe okwe lifutila mo modolongo noN$800.
-fhamalwa@nepc.com.na