Ovanafikola kofikola Onghala Combined paife otava kala va fewa ngeenge tava i komaudano shaashi paife ova pewa omaano oikutu yomudjalo womaudano. 

Ofikola oya pewa uumbidja, eembulukweya osho yo oitolofe. Ovanafikola ova pewa omaano kehangano ledina Kores Construction li li kOnhuno mOhangwena oshivike sha dja ko. 

Ofikola Onghala Combined School oili moshitukulwa shaHangwena moshikandjohoololo shaNgela. Okwa didilikwa ofikola Onghala Combined ya kala ya taalela omashongo yoikutu yokudjala ngeenge tava i komaudano. 

Omukulunhufikola pofikola  Onghala Combined Absai Haiduwa okwa holola olupandula kehangano molwokuyambidida ofikola yaye shaashi paife ovanafikola otava ka kufa ombinga moudano nondjungu. 

“Ihashi kala shiwa ngeenge ovanafikola tava ka kufa ombinga  komaudano ndele inava djala oidjalomwa yomaudano,” ta ti. 

Okwa yelifa ta ti ovanafikola ohava kala va hafa ngeenge navo va djala oikutu yomaudano ngaashi naana ovanafikola vakwao hava kala tava monika. 

Omukulunhufikola okwa ti omaudano okwa fimana kovanafikola noshi li oshinakuwanifa shofikola keshe i kale ya xwaxwameka ovanafikola okukufa ombinga momaudano. 

“Omaudano otaa eta oukumwe kovanafikola osho yo va longife ounongo wavo, “ ta ti. Haiduwa ta hokolola ta ti ovanafikola ove lipyakidila nale okukufa ombinga momaudano okulotoka. “Ovanafikola ohava kufa ombinga momakondjifafano okulotoka, okatanga kokeemhadi, nosho yo oudano woukadona wetanga lokeenyala,” ta ti. 

Haiduwa okwa popya ta ti ovanafikola natango ova taalela omashongo eenghaku domakwa dokudanifa etanga. 

“Ovanafikola vamwe ohava dana eemhadi kombada ile va djale eenghaku davo dopaumwene,” ta ti. Okwa yelifa ta ti ngeenge omunafikola ta dana etanga a djala eenghaku dofikola ohadi kulupa diva. 

Haiduwa okwa pula omahangano a yooloka novaleli vopapolitika opo va ka yambidide ovanafikola neenghaku domakwa dokudana etanga. 

Okwa ti kukeshe ou e na ehalo lokuyambidida ofikola yaye na kwatafane ombelewa omukulunhuwiliki wehongo ile nombelewa yaye. 

-fhamalwa@nepc.com.na