Auleria Wakudumo 

Okambebe Cluster moshikandjohongo shaNdola oka kufa ko oluko lako eshi ka pondola edingonoko lopacluster nova finda paife kedingonoko lopashikandjohongo, moudano wokulotoka. 

Eefikola heyali mOkambebe Cluster oda li da kufa ombinga moinano ile osho yo oyo ixupi. Efiyafano eli ola ningilwa mokapale komaudano kofikola Oshali West. 

Ovo va fika vatatu vopehovelo ovo tava ka mona omhito yokukalela po eefikola davo medingonoko la shikula ko. 

Eefikola odo da kufa ombinga mefiyafano lOkambebe Cluster ongaashi: Ongudi Combined, Okambebe Combined, Immanuel Uahengo Combined, Oushakeneno Combined nOshali Combined. 

Ovanafikola ovo ve shi pondola otava ka shakena neeclutster dikwao moshikandjohongo shEndola. Okudja opo, ovatondoki otava ka twikila okuya kefiyafanepo loshitukulwa. 

Omukulunhu wetanga moCluster Daniel Henghono okwa holola kutya oudano owali wopambili nowa enda nawa. 

“Otwa pondola okumona ovatodoki dingi ovo tava ka kalela po Okambebe,” ta holola ngaho. 

Okwa ti ovanafikola ova deuka notava ka kalela po ocluster medingonoko la landula ko olo la tengenekwa li ka kale ko mo18 Febuluali 2026 kokapale komaudano mOshakati. 

-awakudumo@nepc.com.na