Auleria Wakudumo
Ovanamibia okudja keembinga neembinga ova twika omiti okudimbuluka nokutyapula oshivilodalo shOmukokolipresidente nakufya Sam Nujoma.
Moshilandopangelo moWindhoek, ovanambelewa voikandjo ya yooloka yepangelo ova dimbulukila edalo lanakufya koHeroes’ Acre oko a fudikwa.
Nakufya okwa dalelwe momafiku 12 Mai omudo 1929. Eshi oshi li oshikando shotete Ovanamibia tava tyapula edalo lOmukokolipresidente eshi a xulifa neudo.
Vamwe vomovanambelewa ova holola nghene sha fimana okudimbuluka oilonga yanakufya oyo a ningila oshilongo.
Omumwainamati waNujoma, Hiskiel Nujoma okwa holola kutya ove udite natango oluhodi kefyo lomumwainamati.
Ashike nande ongaho, Nujoma okwa ti ove udite etumba eshi Ovanamibia va dimbuluka edalo laye onghela.
Omutekulu wanakufya Prins Nujoma okwa holola kutya xekulu okwa li omulitulemo moilonga yaye aishe.
“Ehalo laye Ovanamibia va kale ve litula mo yo moilonga yavo okuyambula po oshilongo,” Nujoma ta ti.
Omunandjungu mopolitika nale, Nahas Angula okwa dimbuluka nghene nakufya a li kakukutu komatanga muwa nokwa holola kutya ondjokonona yaye oi na okukalekwa po fiyo okomapupi tae ya.
Minista womauyelele nomakwatafano opaungoba Emma Theofelus nombelewa yoSam Nujoma Foundation ova kumaida oshiwana shi twike omiti moule womwedi ou okudimbuluka Omukokolipresidente Sam Nujoma.
Omupresidente Netumbo Nandi-Ndaitwah okwa twika omuti koHeroes’ Acre okudimbuluka Omukokolipresidente opamwe nomufiyekadi Kovambo Nujoma okudimbuluka onghalamwenyo yomuholike waye.
Eefikola da yooloka moshilongo nando oda kufa ombinga mokutwika omiti okudimbuluka edalo lOmukokolopresidente.
Ovanafikola novahongi pofikola Eluwa Recreation School koshitayi shovahongwa ve na ounghundi wopamadiladilo hau ifanwa navo ova twika omiti.
Omukulunhufikola Loide Shipopyeni okwa holola kutya pamwe novahongwa vaye ova twika omiti odo okudimbuluka Omukokolipresidente Sam Nujoma.
“Omiti edi otadi kala ondjokonona yoshilongo.
Fye ongovahongi otu na oshinakuwanifwa shokukwashilipaleka kutya otwa longa ovahongwa vepupi tali ya ondjokonona yoshilongo omo mwa kwatelwa ondjokonona yependa efindani laNamibia Sam Nujoma,” Shipopyeni ta ti.
Laimi Nghidinwa, omukalimo womolukanda Shipepe, Ohakweenyanga mOngwediva okwa ti okwa uda etumwalaka koradio ndele ta longekida okamuti kaye.
Nghidinwa okwa holola kutya oku wete sha fimana okutwika omiti okudimbuluka omukondjelimanguluko woshilongo eshi.
“Ngeno okwa li tashi dulika nokuli, ngeno ohatu lombwelwa kutya atushe natu twike omiti edi hadi imi opo tu kale hatu li oiimati iwa okudimbulukwa tatekulu wetu,” Nghidinwa ta ti.
Nghidinwa okwa holola yo kutya ngeno okwa li tashi dulika ngeno omiti adishe odo da kunwa okudimbuluka nakufya otadi mu lukilwa nokuli.