OHANGWENA- Opolifi moshitukulwa shaHangwena otai konakona oibofa ivali ya yooloka yovakainhu ve na oulema va kwatwa onghonga omanga umwe vati okwa pewa eteelelo.

Omupopiliko wopolifi moshitukulwa shaHangwena Warrant Andreas Nghiyolwa okwa koleka oiningwanima ei ivali yomakwatonghonga.

Oshibofa shotete okakadona keedula 15 oka kwatwa onghonga lwoikando ya yooloka komulumenhu womushiinda shavo.

Oshiningwanima osha ningilwa kOshikango keumbo oko ha kudi okakadona okudja omudo 2024 fiyo oneudo.

Opolifi oya hokolola tai ti omufekelwa okwa kala noku li va kela meumbo ha mu di nakuninga oshihakanwa lwoikando ya yooloka ndele te mu kwata onghonga.

Nakuninga oshihakanwa paife okwa pewa eteelelo komufekelwa ou.

Omufekelwa ina kwatwa po manga nomakonakono opolifi otaa twikile.

Oshiningwanima shikwao, okakadona ke na oudu wopamadilaadilo keedula 19 oka kwatwa onghonga komulumenhu womushiinda shavo.

Oshiningwanima osha ningwa, komukunda Olulongo Omaandaxa efimbo longula meumbo ha mu di nakuninga oshihakanwa.

Ota ku hokololwa kutya omufekelwa okwa ya keumbo loonakuninga oshihakanwa ndele te mu longele omunyonena wopaixulo.

Omufekelwa okwa kwatwa nota holoka nena momhangu wamangestalata waEenhana.

Okwa didilikwa ounona va ninga oihakanwa yokukwatwa onghonga kovashiinda shavo ile kovapambele osho shi li tashi limbilike paife.

Opolifi oya kumaida ovadali opo tonatele ounona vavo nelitulemo unene tuu ngeenge tava di mo momaumbo molwashi oibofa yomakwatonghonga ounona oya ninga ihapu paife.

-fhamalwa@nepc.com.na