Abraham Mwanyekange 

OSHAKATI – Omaumbo a konda 50 molukanda Oneshila mOshakati oku li moupyakadi womeva oo e lihanena olukanda alishe konima yoivike itatu paife. 

Beata Namweya womido 63 okwa lombwela Kundana ta ti, okwa ninga omafiku atatu ina dja mo meumbo molwaashi ke na apa ta pitile eshi eumbo laye la kondekwa komeva. 

“Onghela okwa li nda hala ndi ka konge omboloto yange ndele mokupita ashike oshivelo sheumbo onde lidenga po molwoule womeva,” ta ti. 

Namweya okwa ti mOneshila okwa kala mo eedula da fika po-30 paife, ndele ina mona nale omeva e fike opo a yuka momaumbo nomeenduda dokunangala. 

Omukalimo wumwe natango womOneshila okwa yandja ombedi kelelolodoolopa laShakati ta ti ola dopa okutunga po omikangha dopamufika dokutondoka omeva. 

“Uumukangha ovo va tungwa ova yuka ashike metale, lo shama la hada nena ohali tilile ashike la ukifa momaumbo etu molwaashi kape na vali apa taa dulu okuuka,” ta ti. 

Ovaneshila vamwe ngaashi ovo vomOkasikili ova pula opo va tembulwe filufilu va kongelwe eenhele dipe opo va kale kokule nomeva. 

Antanga Agatus omunashipundi wOneshila mokakomitiye keyambulepo lodoolopa (LDC) okwa ti okwa li va shangela kombelewa yamayola osho yo komunambelewapitifi ashike fiyo opaife inava mona ko omanyamukulo asha. 

Mayola wodoolopa yOshakati Leonard Hango okwa ti ovakalimo vamwe vomOneshila ova tungila momeva onhomenawina nonande elelo le va lombwela vehe shi ninge. 

Okwa weda ko ta ti onhele yetulululo olaavo ve li longekida okutembulwa. 

Hango okwa weda ko ta ti Oneshila oya pwa nale okutendulululwa mefimbo lixupi ota va ka tulwa melandulafano li li nawa lo otali ka eta po ondjila yokutondoka omeva aye kokule. 

Hango okwa weda ko ta ti ota ka tala onghalo ye mwene kutya oya fa peni. 

Mayolo okwa ti omalelo eedoolopa kae na eenghono dokufa eendama omo tava dulu okukwatela mo omeva opo ihae lihanene odoolopa, ta ti osho oshinakuwanifwa shoshitopolwa. 

Eefikola dopetameko mbali oda pata mOneshila molwa omeva . 

-abbenghilai@gmail.com