Omulumenhu weedula 40 ou vati a kwata okaana kaye keedula 17 onghonga osho a kwatwa po eshi a hangika moAngola a hondama. 

Omukulunhu wopolifi moshitukulwa shaMusati, komufala Ismael Basson okwa koleka ta ti omufekelwa ou okwa kwatwa po Omaandaxa. 

Ota holoka nena momhangu yOutapi nota pangulilwa oshibofa shekwatonghonga. 

Oshiningwanima osha ningwa neudo okudja ketameko lodula meumbo lavo komukunda Ohendjeno moshikandjohoololo shaKalongo. 

Opolifi oya hokolola tai ti omulumenhu ou okwa kwata okaana kaye onghonga lwoikando ya yooloka ndele te ka ningile omatilifo nekatana. 

Vati okwa kufa ekatana ndele te ka ningile omatilifo kutya ngeenge okaana oke shi popi ote ka tete omutwe. 

Otaku hokololwa kutya okaana oka lopotela ina fiyo ouyelele tau fiki kopolifi. 

Opolifi oya hokolola tai ti omulumenhu oha ufana okaana monduda yaye yokunangala ndele te ka kwata onghonga. 

Opolifi oya hokolola tai ti oya taalela omashongo oibofa yomakwatonghonga taa lopotwa kwa laata, unene tuu ngeenge ounona tava ningilwa omatilifo. 

Ounona paife ova ninga oihakanwa yokukwatwa onghonga kovapambele vavo ashike iha va lopota pefimbo shaashi ohava ningilwa omatilifo omadipawo. 

-fhamalwa@nepc.com.na