ONGWEDIVA – Omupresidente woshilongo Netumbo Nandi- Ndaitwah, okwa ti neudo Ovanamibia aveshe ova teelelika va ka dimbuluke osho yo okutyapula edimbuluko lefiku lekondjelomanguluko loshilongo koitukulwa yavo. 

Nandi-Ndaitwah edi okwe di popya monhumwafo ya leshwa kuminista womauyelele nomakwatafano opaungoba Emma Theofelus, kutya keshe ngoloneya woshitukulwa ota ka unganeka ovakwashiwana vomoshitukulwa shaye opo va dule okutyapula efiku eli. 

“Elalakano okweeta pamwe Ovanamibia opo va dule okuhangana, osho yo okutyapula pamwe noohailwa vakwawo,” Nandi-Ndaitwah ta ti. 

Eembelewa doongoloneya otadi ka tula omalongekido aeshe peenhele, opo va dule okweeta ovakwashiwana pamwe. 

Shito edimbuluko lefiku lekondjelomanguluko losholongo ohali danenwa ashike ponhele imwe, oko omapendafule haa shakene opamwe noilyo yakula yepangelo ndele tava hafele pamwe. 

Ashike nande aishe ya kala hai ende nawa ngaho, ovakwashiwana vamwe ihava dulu okufika peenhele edi molwokuule osho yo omhumbwe yoyeendifo nohava shaala po ashike. 

Amon Hamutenya umwe wovakondjelimanguluko okwa ti okuudite etumba shili neudo, eshi ovanhu va pewa omhito yokutyapula edimbuluko lemanguluko loshilongo moshitukulwa shavo. 

“Onda hafa eshi hai ka shakena noohailwa vakwetu mekondjo, ovo nda ninga efimbo nda djuulukwa shee hatu hafele pamwe noku imba pamwe,” ta ti. 

Mo 21 yaMaarsa omupresidente wotete womukainhu moshilongo Netumbo Ndandi-Ndaitwah ota ka wanifa yo odula koshipundi shokulela Ovanamibia. 

-taimihaihambo2000@gmail. com