ENGELA – Custodia Shikongo ota yandje ombedi kovapangi koshipangelo shaNgela molwaashi ovo vati va etifa okaana kaye ka xulifile medimo.
“Onda ningwa nai kovapangi, onda mona oixuna handi fetwa nda nangala pedu. Ngeno okwa li nda tandwa pefimbo ngeno okaana kange inaka fila medimo,” ta ti.
Omukainhu ou okwa hokolola ta ti okwa ya koshipangelo shaNgela koshitukulwa shaHangwena ta fetwa momafiku 25 Maalitsa 2025 ashike okwa lombwelwa kovapangi kutya natango oku li kokule nokumona okaana.
Okwa weda po ta ti momafiku 4 Apilili natango okwa ya kokanyofi ashike ovapangi ove mu lombwela kutya oku li kokule nokumona okaana.
“Onda tumwa opo ndi ka kale ndi li kosaala yovafimba vakwetu nda nangala pedu petalashe ndi li moshifeta tashi luluma,” ta ti.
Shikongo okwa ti omafiku 7 Apilili okwa ya komafano ndele ta lombwelwa kutya okaana kaye oka hulifila medimo onghee ita dulu okupuluma kuye mwene.
“Onda pula ovapangi opo ndi twalwe koshitandelo molwaashi okwa li handi fetwa unene. Ova nyamukula nge kutya kave shi Kalunga onghee kave na eshi tava ningi po,” ta ti.
Okwa hokolola ta ti omafiku 8 Apilili okwa shuna kokanyofi ashike okwa pulwa a kale omutumba koshipundi ta fetwa.
“Onda pula omupangi umwe kutya nandi pewe etalashe ndi nangale pedu ashike okwa nyamukula nge ta ti pedu ohandi kala ndi kakeke po,” ta ti.
Okwa ti konima yokafimbo okwe likwatelela komupangi umwepo shaashi okwa li ta hala okulidenga po molwoshifeta.
“Efiku olo onda twalwa koshitandelo kEngela nokonima oda tumimwa koshipangelo kOshakati ko-ICU,” ta ti.
Okwa hokolola ta ti efiku la landula okwa kufwa ko ko-ICU ndele ta twalwa kosaala imwepo.
“Omupangi umwe okwe ya kwaame ndele ta lombwele nge ta ti okaana kange oka xulifila medimo kEngela. Okwa lombwela nge ta ti onda pumbwa omuxungimwenyo,” ta ti.
Okwa ti okwa pewa omayakulo exungomwenyo ashike kakwa li shipu kuye shaashi okwa mona oixuna kEngela eshi a ningwa nai kovapangi.
Shikongo okwa ti ovapangi kEngela vati ove mu kufa oshidalelo shaye ina ve mu pula epitikilo.
“Paife itandi ka mona vali ounona shaashi onda kufwa oshidalelo,” ta ti.
Okwa ti okwa pewa omaano ounona vane, omanga okatitano oka xulifila medimo.
Shikongo okwa pula ouministeli wouhaku opo u kale we mu futa oshimaliwa shonhumba molwaashi ovapangi ova longa nouhasha.
“Onda kanifa okaana kange, onda kanifa oshidalelo shange. Natango ohandi luluma konima eshi nda tandwa,” ta ti.
Eshi a kwatafana naKundana omukulunhuwiliki wouhaku moshitukulwa shaHangwena Robert Nandjila okwa koleka ta ti ombelewa yaye kakwa li ya shivifilwa kombinga yoshikumungu eshi.
“Naame nda lombwelwa komutoolinghundana ou. Okudja opo onda kwatafana nomukulunhu koshipangela shaNgela kombinga yoshikumungu eshi,” ta ti.
Nandjila okwa yelifa ta ti ova tameka nale okuninga omakonakono nota kala a shivifila ombelewa yaminista meendelelo.
“Ohatu ka kwatafana naShikongo kombinga yoshikumungu eshi,” ta ti.
Xe yokaana ka xulifa Dirius Haukongo okwa ti ke udite ombili eshi okaana kaye ka fya molwaashi ovapangi ova longa ouhasha.
“Ohandi pe ovapangi epuko. Okwa li va wana okutuma Custodia koshitandelo pefimbo konima eshi va mona kutya ita dulu okumona okaana kuye mwene,” ta ti.
Okwa pula minista wouhaku opo a kale a ya mo eenyala moshikumungu eshi.